Minggu, 27 Oktober 2013

Kaba Si Ali Amat

PENGANTAR
KABA SI ALI AMAT ini disalin dari kitab beraksara Arab-Melayu berbahasa Melayu-Minangkabau terbitan P.W.M. Trap. Leiden tahun 1895 yang dicetak dengan tehnik lithografi. Dapat dipastikan, sebelum mencetak kitab tersebut tidak dilakukan pembenahan, terlihat dari banyaknya penulisan kata yang salah dan tidak konsisten.     
Umumnya penulisan kitab beraksara Arab-Melayu jaman silam yang tidak bertitik koma, seolah berbentuk seuntai kalimat yang amat panjang, maka dalam menyalinnya ke huruf Latin, kita jadikan kalimat-kalimat pendek dengan sedikit pembenahan dengan maksud memudahkan para peminat membacanya. Selamat membaca!
      
                                                                                Anas Nafis
                                                           
        
KABA SI ALI AMAT

Dicabiak kain dibali,
Dicabiak sahalai deta,
Mamintak tabiak kami banyanyi,
Nyanyi taliriah jadi kaba.
Banda urang kami bandakan,

Padi barapak di pamatang,
Disaok daun jarami,
Kaba urang kami kabakan,
Antah talabiah jo takurang,
Hanyo parintang-rintang hati.

Kaik bakaik rotan sago,
Takaik di aka baha,
Tabang ka langik tabarito,
Jatuah ka bumi jadi kaba.


Sialah urang takaba, takaba Si Ali Amat, takaba bakabau banyak, takato bajawi banyak. Lah tinggi ruponyo hari, kiro-kiro pukua salapan, sapanggalahan matoari naiak,  bakato Puti Linduang Bulan:
“Anak kanduang Si Ali Amat, jagolah ba a anak tidua, lah tinggi candonyo hari. Singkokanlah kandang kabau kito, alaukanlah jawi kito”.
Io di Si Ali Amat, mandanga kato mandeh kanduang, lah jago garannyo tidua, disingkokannyo pintu kandang, dialau molah tu kabau, kalua ka tangah padang.
Lah tibo di tangah padang, hari ribuik mandanguang-danguang, tidak tabedo garang paneh, bak ka putuih rangkai hati. Tidak tabedo dareh ribuik, bak ka cabiak ujuang deta.
Bakato tuo di padang:
“Adiak den Si Ali Amat, tungguilah kabau kito, kabau kito sagintuang-gituang, awak den kapai bataduah, ka kayu bapucuak sirah”.
Manjawek Si Ali Amat:
“Kok bak nan tun janyo tuan, lah io pulo janyo ambo, nak ambo tunggui kabau tuan, pailah tuan bataduah!”
Mambao kabau Si Ali di tapi labuah, nan gadang io mo kabau nan badua1,. bataduah Si Ali Amat di bawah paruik kabaunyo.
Lah lalu molah tu urang, urang tuo mambao sadah. Takajuik kabau si Ali,  tapijak ujuang kukunyo.
Bakato Si Ali Amat, sarato hariak bulalangnyo:
“Hantu bintalak2 di ma iko, hantu paburu di ma iko, kabau den dikajuikinyo. Sikolah makan mo tangan den, siko manganai mo kaki den”.
Bakato urang nan lalu:
“Indak den mangajuiki kabau ang, bukan den hantu bintalak, ukan den hantu paburu. Awak den urang tuo buruak, baju buruak kain buruak, roman den pun buruak pulo. Bahari-hari to makan, babulan-bulan to minum, diam den di rimbo gadang, makan umbuik-umbuik  pua, minum rangek-rangek tabiang. Awak den manjua sadah, sadah den sakupang3 ganok, sapitih to amuah labiah, saratuih to amuah kurang, sakupang sajo sadah den”.
Bakato Si Ali Amat:
“Amai janyo den di amai, kununlah sadah sakupang, antakan bakeh amai den – ka rumah si Rumin Judin, ka kampuang si Linduang Bulan. Baliau sadang manalok kain4, lah marandam pulo”.
Bakato rang tuo buruak:
“Anak den si Ali Amat, di ma rumah si Rumin Judin, di ma kampuang si Linduang, katokan bana paik-paik!”
Bakato Si Ali Amat:
“Iliakan labuah nan panjang, di suok jalan ka pai, di kida jalan ka pulang, di labuah kelok basiku, pudiang ameh paganyo labuah, pudiang ganin (?) paga di dalam, anjiluang barumpun–rumpun, sikasok babatang-batang,  lansano batimbo jalan, di karambia atok tungku5, di pinang nan linggayuran, di sanan kampuang amai den.
Tapi ado caceknyo sabuah, labuah urang bapangawa, kampuang nan tun bajagoi. Kok tau pangawa labuah, sapuluah ameh bautang. Kok tau pangawa kampuang, salucuik-lucuiknyo jo badan. Utang tak buliah dibaia, salah tak buliah ditimbang”.
Bakato urang tuo buruak:
“Kununlah itu dikatokan, bapantun den sabuah,
Nyak manguah nyak manganji,
Nyak basudu bilang-bilang,
Kok tak tuah nak tapanji,
Kok tak rang buruak mak nyo ilang.
Tunjukan juo rumahnyo, katokan juo kampuangnyo”.
Lah berang si Ali Amat:
”Di sanan kampuang si Limduang, di sanan rumah si Rumin, di labuah kelok basiku, pudiang ameh paganyo labuah, pudiang ganin paga di lua, anjiluang barumpun-rumpun, sikasok babatang-batang, lansano batimbo jalan, di rangkiang nan tajongkang, di rumah disungkuik labu manduang” kato Si Ali.
Bajalan rang tuo buruak, lah ilia labuah nan panjang, jauah bak raso di jalan,  dakek bak raso ka tibo, ampia bak raso ka sampai.
Lah  tibo molah garangan – lah sampai molah ka io – ka halaman si Rumin Judin – si Rumin Judin sadang batanun.
Bakato rang tuo buruak:
“Hai rang mudo nan batanun, bari luruih den batanyo, nan ma nan rumah si Rumin, nan ma nan kampuang si Linduang?”
Bakato si Rumin Judin:
“Amai janyo den di amai, lah tatakok di nan io, tak tatakok di nan bukan”.
Bakato Si Rumin Judin:
“Amai ka rumahlah amai, lah auih garan amai den, lah litak molah garangan,  sajauah nangko lah jalan”.
Manjanguak Si Lindung Bulan, tagak ka pintu ka rumah. Bakato Si Linduang Bulan:
“Alah moh kambang bungo pandan,
Kami lah cameh maluruti,
Alah moh datang nyao badan,
Kami lah cameh manuruti”.
Bakato rang tuo buruak:
“Bukan do pantun nan ka babaleh, bukan do kato ka bajawek,
Manga ka luruik maluruiki,
Bungo pandan ka kambang juo,
Manga ka turuik manuruiki,
Awakden ka datang juo” katonyo rang tuo buruak.
Bakato Puti Linduang Bulan:
“Amai ka rumahlah amai, lapiak  lah sudah den kambangkan, tabia lah sudah tasingkok, ka bakeh amai den duduak” katonyo Si Linduang Bulan.
Bakato rang tuo buruak:
“Amaklah kok tak ka rumah, saelok nangko rumah ko, saindah nangko rumah ko, saburuak nangko roman den”.
Payah gigiah bagigiah – lah panek tangka batangka – Si Linduang maimbau juo:
“Amai ka rumahlah amai, rugi den baduri-duri, paluah den kalatiakan, asa lai rumah den sudah, ka bakeh amai den duduak”.
Mandanga kato Si Linduang, ka rumah urang tuo buruak, duduak di sandaran  parian.
Bakato Si Linduang Bulan:
“Adiak den Si Kambang Manih, Kambang Manih kambang denai, kambanglah bungo saliguri. Bukan Si Kambang nak rang kini, Si Kambang nak rang nyok ari. Capek kaki ringan tangan, capek kaki to manaruang, ringan tangan to mamacah.
Si Kambang urang paarih, balun di suruah anyo lah pai, balum diimbau nyo lah datang”.
Bakato Si Linduang Bulan:
“Cabiak siriah Kambang oi, gatoklah pinang Kambang oi, biaklah sadah Kambang oi, biaklah jo pati santan, lunak nan bak banak balam!”
Balari Si Kambang Manih, dicabiak siriah nan bahalai, dibiak sadah jo santan,  digatok pinang sakali, dibarikan bakeh Si Linduang.
Bakato Si Linduang Bulan:
“Amai kamarilah duduak, siriahlah sudah bacabiak, pinang lah sudah bagatok, sadah lah sudah babiak, kamari amai mangunyah”.
Manjawek rang tuo buruak:
“Amaklah ko tak ka kiun, saelok nan tun lapiak ko, saburuak nangko roman den.
Kok amuah adiak baragiah, kapualah pinang satagok, palikan sadah sapalik,  sapiklah jo rantiang batuang, unjuakanlah kamari” katonyo rang tuo buruak.
Lah panek gigiah bagigiah, lah payah tangka batangka, bainsuik-insuik rang tuo.
Bakato Si Linduang Bulan:
“Adiak den Si Kambang Manih, abuihlah kawa Kambang ai, tanaklah nasi Kambang ai, lah auih bana amai den, lah litak bana garangan”.
Bawari Si Kambang Manih, bagageh-gageh awaknyo, kupi tajarang sakali. Si Kambang rang ringan tangan, aso dikakok duo jadi. Sadangkang batu ladonyo, duo baleh gulai nan masak.
Disanduak nasi ka pinggan, dikaka-kaka manyanduak, bujuanyo samo bujuanyo, halintang samo halintang, di tapi samuik bairiang, di tangan awan bajumpo. Elok diirik-irikan, elok makanan rajo-rajo, elok minuman sutan-sutan. Singgang parpati mandua, singgang satitiak adu-adu, kuah salilik tambun jati. Dibao nasi kalua, kalua ka tangah rumah.
Io di Si Kambang Manih,  diisi kupi sakali, diimbau rang tuo buruak:.
“Amai kamarilah makan, lah dingin  kupi di cangkia, lah dingin nasi di pinggan”.
Manjawek rang tuo buruak:
“Amaklah ko tak ka kiun, saelok nan tun rumah ko, saburuak nangko awak den.
Kok suko adiak baragiah, tariak di lauak-lauak ayam, onyokanlah di kau kamari”.
Lah panek gigih bagigiah, lah payah tangka batangka, lah datang rang tuo buruak, jadi makan jadi minum, Si Linduang Bulan nan surang, Si Rumin Judin nan surang, rang tuo buruak nan surang, barampek  jo Si Kambang Manih.
Bawari rang tuo buruak, manyuok inyo igo suok, cukuik kaampek basuah tangan,  kalimo jo kumua-kumua, bak nan tun makan rang tuo buruak.
Sudah makan sudah minum, bakato rang tuo buruak:
“Adiak den Si Rumin Judin, nan surang Si Linduang Bulan, baia balilah sadah den, hari lah barimbang tinggi, jalan jauah io di den!”
Bawari Si Linduang Bulan, dilantak peti nan gadang, mandanguang tali bubutan, duo tigo kunci nan jatuah. Di bao pitih kaluar, kaluar ka tangah rumah. Dibilang pitih limo kupang, dikatokan bakeh rang tuo:
“Nyak lah iko pitih amai, nan sakupang bali sadah, nan saameh den baragiah samiang”.
To amuah rang tuo buruak, bakato rang tuo buruak:
“Sadah den sakupang sajo, sapitih to amuah labiah, sarimih6 to amuah kurang. Kok suko adiak baragiah, kudian amak den datang”.
Lah panek gigiah bagigiah, lah panek tangka batangka, to amuah rang tuo buruak.
Bawari Si Linduang Bulan, ditariknyo pitih cako, dibuhuakannyo ka kain ka cawek, ka gunjai alai, ka cawek rang tuo buruak.
Bakato rang tuo buruak:
“Lapeh baelok den di adiak, awak den kan ka bajalan, lapeh jo hati nan cuci, lapeh muluik nan manis”.
Bakato Si Linduang Bulan :
“Kok bak nan tun janyo biai, suruik pulolah kudian?”
Lah tagak rang tuo buruak, tagak ka pintu rumah. Maadok rang tuo buruak, ka bakeh Si Linduang Bulan:
“Saelok nangko rumah ko, sarancak iko rumah ko, gonjongnyo rabuang mambacuik, parannyo ula mangalampai,  tuturan labah mangirok, cibuak kanso balariak, janjang ko perak balanja.
Kok elok iolah elok, kok rancak iolah rancak, tagah caceknyo sabuah, lailah to den katokan”.
Lah tagak Si Linduang Bulan, dipacikannyo urang tuo:
“A iko cacek rumah den. Kunun to amai katokan, amai to buliah bajalan. Rugi den badorai-dorai, paluah den den kalatiakan, asa lai rumah den sudah. Rumah sudah tukang babunuah, tak dapek ditiru lai.
Kunun tak amai katokan, amai tak buliah malangkah!”
Bakato rang tuo buruak:
“Lumuik pandan dipintokannyo,
Ka bawah condong buahnyo,
Rumik den mengatokannyo,
Ka cabuah kasudahannyo”.
Bakato Si Linduang Bulan:
“Kunun tak amai katokan, amai tak buliah bajalan, katokan juo caceknyo!”
Bakato rang tuo buruak:
“Sia tu urang di sanan, io mo urang gubalo, di padang talau awi, di bukik tandai langkudu, di bawah baringin ameh, di tapi labuah nan gadang, Si Ali Amat namonyo. Kok anak ko to kok ukan, ditunjuakannyo rumah ko.
Bak nan tun janyo bakeh den, di sanan rumah Si Linduang, di rumah dirungkuik labu, di rangkiang nan tajongkang, di junjuang siriah nan rabah, di pinang nan bajungkatan, katonyo Si Ali Amat.
A itu isi katonyo, a itu buah katonyo, antah kok nyo basangkoan buruak. Kok inyo basangkoan buruak, itulah cacek rumah ko, itulah calo rumah ko”.
Lah lapeh urang tuo buruak. Bajalan urang tuo buruak. Manggaruang Si Linduang Bulan. Rauangnyo sampai ka pitalo, rahainyo sampai ka atek langik. Didamuak dado nan jajai, bakasan jari nan limo, anam jo patahan cincin.
Lah masuak ka biliak dalam, mangaluah ka katiduran, mangaluah ka kalang-hulu,  badarai aia matonyo. Bakato di dalam hati:
“Anak malang anak cilako, anak cilako bago birah”. 
Lah lamo bakalamoan, lah panjang bakalalaian, lah patang candonyo hari, lah pulang Si Ali Amat, dimasukkannyo kabaunyo.
Hari hujan kaciak-kaciak, ka halaman Si Ali Amat, alah tagak ka bawah  lumbuang – maimbau Si Ali Amat:
“Amai den Si Linduang Bulan, jawek juo biai jawek juo, jawek juo sambang dadiah den, kabau den alun basaok, nan kaciak alun bakungkang!”
Bapakak samiang Si Linduang.
Lah tigo kali inyo maimbau, bapakak juo Si Linduang.
Bakato Si Ali Amat:
“Ba a ko lah iko amai den, paruik ko lah nan umayang, kapalo ko lah nan ngalu, kapatang indak bak nangko”.
Lah jago Si Linduang Bulan, manjanguah ka pintu gadang:
“Anak den Si Ali Amat, bukan paruik den nan umayang, bukan kapalo den nan ngalu. Anak den Si Ali Amat, bakiroklah ang di siko, bakikihlah ang di siko.  Rang cilako tungku bangkah, urang basibidai takirok7, urang basiabu ateh tunggua,  uwia-uwia manangeh jamua!”
Bakato Si Ali Amat:
“Dek a ko lah iko amai den, lah pasiak molah amai den, lah jawa8 molah amai den,  kapatang indak bak nangko”.
Bakato Si Ali Amat:
“Ba a amai mungko bak nan tun, di ma bana salah siliak den, kok lah bak nan tun di amai. Mak bak nan tun kato urang,
Tariak di amai nan babuah,
Nan bapandan nan  babungo,
Nan babungo tariak di amai,
Nan bajalan nan cilako” katonyo Si Ali Amat.
Bakato pulo Si Ali:
“Turunkan molah pakai den, awak den kan ka bajalan”.
Marentak Si Linduang Bulan, ditariak pakai Si Ali, dikirokannyo sadonyo,  dibahekannyo ka halaman.
Baru tatabua di halaman, io di Si Ali Amat, ditariaknyo kain nan tun. Disaruangkannyo sarawal, sarawal panjang batakat, batakat bakatanahan,  bauwia-uwia manyasok. Disaruangkannyo bajunyo, bajunyo sambua-samburan, samburan bintang di langik.
Detanyo deta panjang bakatah, diikek nak rang Koto Tuo, buatan rang Padang Panjang.
Dilakekannyo karihnyo, karih sampono ganjo ireh8, bapantang karam di lauik, samaso parang jo Bugih, jajak ditikam mati juo.
Manjaguah Puti Kasumbo, bakato Si Ali Amat:
“Rang kampuang rilahkan rilah, rilahkan labuah jo tapian, rilahkan sumua bakeh mandi, den ka bajalan anyo lai”.
Bakato pulo bakeh amainyo:
“Amai den Si Linduang Bulan, rilahkan biai rilahkan. Rilahkan susu nan sacucuik,  rilahkan nasi nan sasuok, rang buruak ka pai bajalan”.
Indak bajawek diamainyo, bakato Puti Kasumbo:
“Kakak dan Si Ali Amat, kito nan bak anak balam, sikua jantan sikua batino. Kunun kakak ka bajalan, bao juo denai di kakak” katonyo Puti Kasumbo.
Manjawab Si Ali Amat:
“Manga kau ka pai jo den, awak den urang cilako, urang cilako tungku bangkah, manga den ka kau turuikan”.
Bakato Puti Kasumbo:
“Kunun kakak ka bajalan, bari janji den sabanta!” katonyo Puti Kasumbo.
Bajalan Puti Kasumbo, io ka padapuran. Dibaka molah tu bajo9, disangai molah tu minyak.
Lah sudah bajo tabaka, lah sudah minyak basangai, dibao turun ka halaman, ka bakeh Si Ali Amat.
Bakato Puti Kasumbo:
“Kakak ka bajalan jauah, mari den tambua jo bajo, mari den tampa jo minyak,  mari den kabek jo cawek”.
Lah sudah dibajoinyo, bawari Si Ali Amat, rancak nan bukan ulah-ulah, elok nan tidak tabedokan. Manangih Si Ali Amat. Bakicau murai ateh batu, bakaja cacak ateh paran, bakaja tupai ateh kayu, mancaliak Si Ali Amat.
Malanglah Si Ali Amat, batungkuik kayu-kayuan.
Bakato Si Ali Amat:
“Adiak den Puti Kasumbo, lapeh baelok den di adiak, lapeh jo hati nan cuci, lapeh jo muluik nan manih”.
Manangih Puti Kasumbo, aia mato badarai-darai, bakato sambia sanguak-sangak:
“Bao den kakak bao den, bao juo den di kakak, ka langik bao den tabang, ka lauik bao den manyalam”.
Lah tampak pulo di amainyo, batambah bangih Si Linduang:
“Angkuiklah tu adiak ang, baoilah tu adiak ang, indak paguno di den lai, urang cilako kaduonyo”.
Bakato Si Ali Amat:
“Adiak den Puti Kasumbo, kunun kau ka pai jo den, manungi bana abih-abih,  agaki bana paik-paik, buruaknyo nan ka dikaji, usah manyasa kudian.
Litak usah kau katokan, auih usah kau sabuikan, bak nan tun rang pai jo den “.
Manjawek Puti Kasumbo:
“Asa amuah kakak mambao, mati kakak matilah den, indak den mandawa lai. Ka lauik bao baranang, ka lurah bao manurun, ka bukik bao mandaki, indak den manyasa lai”.
Bakato Si Ali Amat:
“Adiak Puti Kasumbo, kok lah bak nantun janyo adiak, asa lai amuah samo mati,  asa lai amuah samo ilang, manuruikan urang cilako, kito pai molah bajalan, di ma janjian ditapati, di ma untuang disudahi”.
Bajalan Si Ali Amat, manuruik Puti kasumbo.
Ado sabanta inyo bajalan, kiro-kiro sapalantiangan, maadok suruik Si Ali, lalu manyumpah marahai.
Manyaru Si Ali Amat:
“Hai arawah, hai malaikat, hai angin punco baliuang, kirok juo rumah amai den, bubuangkan lumbuang sadonyo, tungkuikan lasuang nan gadang, kirokan kabau jo bantiang, mak uweh hati amai den”.
Sudah manyumpah marahai, bajalan Si Ali Amat:
Sabanta inyo bajalan, lah sampai ka simpang jalan, duduak bahantilah Si Ali.
Dipataruhinyo adiaknyo:
“Kito ka bajalan jauah, kampuang tak tantu ka dituruik, dangau tak abeh nan ka diunyi. Litak usah kau katokan, auih usah kau sabuikan, bak nan tun rang pai jo den, urang manuruik rang cilako”.
Jaweknyo Puti Kasumbo:
“Usah kakak katokan juo, sajak cako lah den pikiri, sajak cako lah den manuangi. Lah den kaji elok buruaknyo, indak den manduo lai, indak den manyasa lai. Mati kakak matilah den, indak auih ka den katokan, indak litak ka den katokan”.
Lah sudah inyo barundiang, bajalan Si Ali Amat, nan surang Puti Kasumbo.
Mulai bukik lah tadaki, mulai lurah lah taturuni, banyaklah rimbo nan tatampuah.
Lah lamo bakalamoan, lah payah Si Ali Amat, lah jariah Puti Kasumbo. Hari nan hujan-hujan kaciak, dicari bakeh bataduah, tampak dinyo rungguak kayu.
Bakato Si Ali Amat:
“Adiak den Puti Kasumbo, kito barantilah di sanan, di dalam rungguak kayu nan tun”.
Bajalan inyo la rungguak kayu, padahan arang10 ula gadang.
Bakato Si Ula Gadang:
“Siko mo sangkang garaman den, di siko kanyang mo paruik den, rajaki datang mauntok, rang dunie sasek kamari”.
Bakato Puti Kasumbo:
“Kakak den Si Ula Gadang, kunun Si Ali ka dimakan, awak den makan daulu,  jan mato den mancaliak, jan talingo den mandanga, pado den baibo hati!
Sabuah lai di kak Ula, awak den urang cilako, indak paguno di urang. Pado iduik eloklah mati, pado manangguang parasaian, usah manyeso amai den”.
Bakato Si Ula Gadang:
“Indak Si Ali ka tamakan, indak awak ko ka talulua. Si Ali urang batuah, awak ko anak rang baiak. Dikunyah garaman tangga, dilulua paruik umayang, awak kau sasek kamari. Jo a kau ka den lapeh, a ka den barikan anjik Si Ali ?
Tariaklah reno di kapalo den, tariaklah cincin di ikua den. Cincin banamo cinto-cinto, pacinto ameh jo perak, pacinto bareh jo padi, pacinto kampuang halaman”.
Bawari Si Ali Amat, ditariak reno jo cincin. Lah dapek reno jo cincin, bakato Si Ali Amat:
“A lah ka den barikan anjik kakak, bakain babaju lai tidak,  makan-minum kami lai tidak. Kami nangko urang cilako, awak kami urang tabuang. Tinggalah kakak di siko, kami bajalan anyo lai”.
Bajalan Si Ali Amat, nan surang Puti Kasumbo. Kiro-kiro sapambaean,  maadok suruik Si Ali:
“Adiak den Puti Kasumbo, caliaklah kakian! Alah lah pasa rimbo satumpak, kayu gadang abih rabah, tabiang tinggi lah abih runtuah, bakeh ula maampeh-ampeh,  inyo mamutuihkan angoknyo, laruik hati den mancaliak, hibo hati den mamandangi, sabab karano di kito, sabab tuahnyo kito ambiak”.
Bakato Puti Kasumbo:
“Kok bak nan tun ka ba a juo, indak kito marabuik, indak kito maniayo, awaknyo amuah baragiah”.
Lah sudah barundiang-rundiang, bajalan Si Ali Amat, nan surang Puti Kasumbo.
Bakato Si Ali Amat:
“Adiak den Puti Kasumbo, lailah lapau sabuah, jan adiak bahanti sinan, di sinan urang panyamun, di sanan urang parabuik, urang paelo paunjun, Maruntun manau galanyo.
Kok kito bahanti sinan, awak kito kok disamunnyo, awak kito kok dirampehnyo,  awak kau kok ditariaknyo”.
Manjawab Puti kasumbo:
“Kok lah bak nan tun janyo kakak, ka ba a janyo den pulo”.
Bajalan juo Si Ali, nan surang Puti Kasumbo. Jauah bak raso ka sampai,  ampiang bak raso ka tibo, tibo di lapau Maruntun Manau.
Lah tibo di halaman lapau, bakato Maruntun Manau:
“Adiak ka rumahlah adiak, nasi lah sudah batanak, kupilah sudah baabuih,  pananti adiak den juo”.
Ka rumah Puti Kasumbo, Si Ali Amat di halaman.
Bawari Maruntun Manau, hati arok bukan kapalang, rajaki datang mauntok,  awak lah ka buliah padusi.
Dibari nasi jo kupi, lah makan minum Puti Kasumbo. Lah sudah minum jo makan,  dimakan siriah sakapua.
Maimbau Si Ali Amat:
“Adiak turun molah adiak, kito bajalan jauah, iko pitih ka pambali nasi, nyak pitih pambali kupi” katanyo Si Ali Amat.
Manjawek Maruntun Manau:
“Kok ang ka bajalan pailah, Puti Kasumbo ka siko. Urang pulang ka kampuangnyo, urang tingga di rumahnyo!”
Bakato Si Ali Amat:
“Ba a nyo ka tingga siko, a jalan mungko bak nan tun. Kok indak ado basabab, kok indak ado bajalan, antah kok kasiak taputiah, antah kok mijan tatagak, antah kok lubang bakali, mungkonyo ka tingga siko!”
Bakato Maruntun Manau:
“Sagaduak a iko urang, sageleang a iko umaik, ka den bunuah paja nangko, ka den jua jauah-jauah. Indak ang danga baritonyo, sadang manau lah den runtunkan!”
Mahambua Maruntun Manau, malompek lalu ka halaman, dicakaunyo pinggang Si Ali, diambuangkannyo sakali, mambaleh pulo Si Ali.
Lah lamo inyo bacakak, batimbang lacuik malacuikan, batimbang antak maantakkan. Diantakkannyo Si Ali, tabanam sahinggan batih. Malompek Si Ali Amat.
Bakato Si Ali Amat:
“Mano ang Maruntun Manau, adaik iduik baleh mambaleh”.
Dibalehkannyo di Si Ali, disembanyo pinggang Maruntun Manau,  diantakkannyo ka tanah, tabanam sahinggo pinggang. Lah jebong-jebongi, talalu putuih jo angoknyo, io Si Maruntun Manau.
Lah turun Puti Kasumbo, bakato Si Ali Amat:
“Lah uweh hati adiak den, bara ka gadang doso den, lah surang mambunuah urang”.
Lah lamo bakalamoan, bajalan Si Ali Amat, nan surang Puti Kasumbo, ka mudiak juo arahnyo.
Lah jauah inyo bajalan, bakato Si Ali Amat:
“Adiak den Puti Kasumbo, pacik pitaruah arek-arek, pacik pitaruah taguah-taguah, jan adiak lupo-lupokan.
Adolah lapau sabuah, lapau Si Mahayun Bukik, urang nan bagak sakali, urang panyamun panyaka, urang pahelo paunjun, pandai manarah manalintang,  pandai marapek dalam aia, manungkek nan tak jo tupang, manggantuang nan tak jo tali, mangganang nan tak jo aia, io Si Mahayun Bukik.
Usah adiak karumah pulo, jan kito baranti sinan, jan kito disamunnyo, jan kito dirampehnyo, usah kito bamusuh jo nyo”.
Bakato Puti Kasumbo:
“Kok lah bak nan tun janyo kakak, ka ba a pulo janyo den”.
Salamo lambek di jalan, jauah basarang dakek juo, ampiang ka tibo anyo lai.
Lah tibo inyo di sinan, di lapau Mahayun Bukik:
“Alah mo kambang bungo pandan
Padi nan cameh maluruiki,
Alah mo datang nyao badan,
Kami nan cameh manuruti.
Adiak ka rumahlah adiak – ko to kupi lah baabuih – ko to nasi lah batanak”.
Manjawab Puti Kasumbo:
“Manga ka luruiki maluruiki,
Bungo pandan ka kambang juo,
Manga ka turuik manuruiki,
Awak den ka datang juo”.
Lah naiak Puti Kasumbo, lah tingga Si Ali Amat, io di tangah halaman.
Io di Si Mahayun Bukik, hati gadang tidak tabedo, arok nan bukan ulah-ulah, awak ka dapek padusi, dibari minum jo makan. Lah makan Puti Kasumbo. Lah sudah minum jo makan, dimakan siriah sakapua.
Ado sabanta antaranyo, bakato Si Ali Amat:
“Adiak den Puti Kasumbo, adiak turun molah adiak, hari lah barimbang tinggi,  jalan jauah ka kito turuik, nyak pitih pambali nasi urang”.
Bakato Mahayun Bukik:
“Indak nyo ka turun do, urang lah datang ka kampuangnyo, urang lah datang ka rumahnyo. Kok ka bajalan pailah, Puti Kasumbo ka di siko!”
Bakato Si Ali Amat:
“Ba a nyo ka tingga siko, a jalan mungko bak nan tun, lai utang tak kabaia. Kok anyo ambek-ambek sajo, kok anyo tahan-tahan sajo, antah kok lubang bakali,  antah kok kasiak taputiah, antah kok mijan tatagak, mungkonyo ka tingga siko!”
Bakato Mahayun Bukik:
“Talampau bana urang nangko, gaduak bana inyo kironyo, tidak ang danga baritonyo”.
Malompek sakali ka halaman, dicakau pinggang Si Ali, diambuangkannyo sakali. Mambaleh Si Ali Amat, dihambuangkannyo Mahayun Bukik, balambin tibo di tanah. Lah lamo garan bacakak, batimbang ampeh-maampehkan, batimbang antak-maantakan. Diantakkannyo Si Ali, tabanam sahinggo pinggang.
Bawari Si Ali Amat, diungkik suok jo kida, lalu mahambua anyolai. Disembanyo pinggang Mahayun Bukik, diantakkannyo ka tanah, tabanam sahinggo lihia. Lah geleng-geleangi, talalu mati sakali.
Lah turun Puti Kasumbo, bakato Si Ali:
“Adiak den Puti Kasumbo, lah payah bana den anyo, bara pulo gadang doso den, baduo mambunuah urang.
Lah uweh hati adiak den, adiak nan tak bahati, adiak den nan tak balimpo.

Sajak samulo den latokan,
Tidak dilatak dalam padi,
Sajak samulo den katokan,
Tidak dilatak dalam hati”.
Bakato Puti Kasumbo:
“Indaklah kakak ka badoso, indak salah dari kito, salah nan datang dari inyo”.
Lah lamo baulak-ulai – bajalan Si Ali nan surang Puti Kasumbo – masuk rimbo kalua rimbo – masuak ka dalam rimbo gadang.
Lah tibo di tangah rimbo – basuo harimau gadang.
Bakato harimau gadang:
“Siko paruik den mungko kanyang – siko garaman mungko singgang – rajaki datang mauntok”, katonyo harimau gadang.
Bakato Puti Kasumbo:
“Kakak den harimau gadang, kok Si Ali ka dimakan, kok Si Ali ka dilulua, awak den lulua daulu, Si Ali makan kudian.  Usah mato den mancaliak, usah talingo den mandanga.
Sabuah lai di kakak, kami nangko urang cilako, urang basibidai takirok, uwia-uwia manangeh jamua, indak paguno di urang, lah dibuangkan amai kami”.
Bakato harimau gadang:
“Indak Si Ali ka tamakan, indak Si Ali ka talulua, Si Ali urang kiramaik, awak kau urang batuah. Dikunyah garaman tangga, dilulua paruik umayang. Awak kau sasek kamari.
A lah iko ka dibarikan, ka baka bajalan jauah, ameh tidak perak pun tidak, ilmu kuaik lai saketek, pakailah iko di kau, mari den aja pandeka!”
Lah jimek itu dibarikan, bakato harimau gadang:
“Adiak bajalanlah adiak, itu samiang paragiah den”.
Bakato Si Ali Amat:
“Kakak oi harimau gadang, kami bajalan anyo lai”.
Bajalan Si Ali Amat, nan surang Puti Kasumbo.
Lai sabanta inyo bajalan, kiro-kiro sapambadian, mancaliak suruik Si Ali. Patuih lah babintang-bintang, kilek lah baapi-api, ribuik lah mandanguang-danguang,  hujan gamuruah-gamuruah.
Lah pasa rimbo satumpak, samuik kicik abih lipua, kayu gadang abih patah,  tabiang tinggi abih runtuah, harimau gadang mangaruang-garuang, inyo mamutuihkan angoknyo, tuah lah dibao urang.
Bakato Si Ali Amat:
“Adiak den Puti Kasumbo, laruik hati den mamandangi, mancaliak harimau nan tun, sabab karano di kito”.
Bajalan juo Si Ali, ka mudiak juo candonyo. Lah lamo maso bajalan,  paluahlah kubang kabauan.
Bakato Si Ali Amat:
“Adiak den Puti Kasumbo, pacik pitaruah arek-arek, pacik pitaruah taguah-taguah, jan adiak lupo-lupokan!
Adolah lapau sabuah, lapau Mahampiang Basi, urang pahelo paunjun, urang pacakak paangak, urang panyamun panyaka.
Kito kalau ka kian, jan adiak ka rumah pulo, usah manjadi nan lah alah!”
Bakato Puti Kasumbo:
“Kok lah bak nan tun janyo kakak, ka ba a janyo den pulo”.
     Lah lamo maso bajalan, hampiang bak raso ka tibo, jauah bak raso di jalan. Lah sampai molah garangan, lah tibo molah ka io, di lapau Mahampiang Basi.
Bakato Mahampiang Basi:
“Adiak ka rumahlah adiak, lah auih raso adiak den, lah litak raso adiak den,  sajauah nangko lah jalan, sapayah nangko lah awak”.
Bakato Puti Kasumbo:
“Amak lah ambo kok tak ka rumah, jalan jauah ka kami turuik, kampuang tak tentu ka dijalang”.
Bakato Mahampiang Basi:
“Ka rumah juo sacacah, bagio makan sirih samiang”.
“Kok lah bak nan tun janyo tuan, ka rumah juo molah ambo” katonyo Puti Kasumbo.
Lah ka rumah Puti Kasumbo, kupi tahanta sakali, nasi tahanta sakali.
Io di si Mahampiang Basi, hati lah angek-angek dingin, awak ka buliah padusi, nyak lakeh samianglah juo, acoknyo mak kunjuang sampai, dareh mak nyo kunjuang tibo.
Sudah makan sudah minun, dikunyah molah tu pinang, io di Puti Kasumbo. Sarilamak jatuah ka paruik, sari manih tingga di bibia, do bibia Puti Kasumbo.
Bakato Si Ali Amat:
“Adiak turun molah adiak, hari lah barimbang patang, jalan ka jauah di kito”.
Manyauik Mahampiang Basi:
“Kok ka bajalan pailah, Puti Kasumbo ka di siko, urang lah sasek ka rumahnyo!”
Bakato Si Ali Amat:
“Tuan den Mahampiang Basi, ba a nyo tuan tahani, ba a nyo ka tuan ambek. Lai utang tak tabaia, lai arato tuan diambiaknyo.
Kok anyo tahan-tahan sajo, antah kok putuih angok den, antah kok kalu lidah den, antah kok rabun mato den, mungkonyo ka tingga siko”.
Bakato Mahampiang Basi:
“Sagaduak-gaduak iko umaik, sagaliniang iko urang, anak bincacak bincacau,  anak ngiang-ngiang rimbo, anak si caciang panarahan. Ka den bunuah anak urang nangko, ka bajua jauah-jauah, ka babunuah mati-mati”.
Malompek Mahampiang Basi, turun ka tangah halaman, dicubokannyo bacakak,  io jo Si Ali Amat.
Dikaokannyo langkah tigo, dianjuakannyo nan ciek, mancakau Si Ali Amat.
Lah dapek Si Ali Amat, ditumbuakannyo ka gumi. Tabanam Si Ali Amat, io sahinggo lihianyo.
Bawari Si Ali amat, diungkiknyo suok jo kida, disintakannyo badannyo,  mahambua inyo kalua.
Dilompekinyo di Si Ali, disembanyo pinggang Mahampiang Basi, diantakkannyo ka gumi. Io si Mahampiang Basi, lah ilang jo bubun-bubun, lah putuih jo angok-angok, talalu mati sakali.
Lah turun Puti Kasumbo, bakato Si Ali Amat:
“Lah uweh hati adiak den, lah sanang hati adiak den, batigo mambunuah urang, bara ka gadang doso den. Adiak den nan tak bahati, adiak den nan tak balimpo, indak mamacik pitaruah.
Sajak samulo ambo latokan,
Tidak ka latak dalam padi,
Sajak samulo den katokan,
Tidak kau latak dalam hati.
Awak payah badoso pulo” katonyo Si Ali Amat.
Bakato Puti Kasumbo:
“Kok payah awak lai manang, indak awak ka badoso, indaklah salah dari awak”.
Bajalan Si Ali Amat, Puti Kasumbo nan surang.
Lah jauah maso bajalan, mulai rimbo lah tarimbaki, mulai bukik lah tadaki, mulai lurah lah taturuik, bajalan juo awaknyo.
Lah sasek ka tangah padang, indak tabedo data padang, indak barumpuik satu alai, indak bakayu satu batang, bajalan juo awaknyo.
Lah jauah maso bajalan, lah sasek ka rumpun kayu, tidak tabedo rancak kayu,  tidak tabedo indah kayu, pucuaknyo cewang ka langik, ureknyo pajam ka bumi.
Bahanti di rumpun kayu, io mo Si Ali Amat, nan surang Puti Kasumbo.
Bakato Si Ali Amat:
“Tidak tabedo jariah awak, paluahlah batitiak-titiak. Sagadang nangkolah paneh hari, paneh manginga-inga hari, hujan manyangik limau, hari ribuik mandanguang-danguang.
Adiak den Puti Kasumbo, pacik pitaruah arek-arek, pacik pitaruah taguah-taguah, jan adiak lupo-lupokan, den ka lalok tujuah hari, io mo di rumpun kayu,  mak lapeh payah den nangko, mak hilang paniang den nangko, jan adiak jago-jagokan!”
Bakato Puti Kasumbo:
“Kok lah bak nan tun janyo kakak, ka ba a janyo den pulo”.
Lah lalok Si Ali Amat, alah sahari duo hari, lah tigo hari kaio. Bakato Puti Kasumbo:
“Kakak den Si Ali Amat, jagolah kakak tidua, jalan jauah ka kito turuik,  kampuang tak tantu ka diunyi, rumah tak tantu bakeh diam”.
Bapakak samiang Si Ali, manangih Puti Kasumbo. Lalok lah talalu lalai, lalai lah talalu mati.
“Lah sampai aja kakak den, den imbau indak babunyi”.
Lah rusuah Puti Kasumbo, aia mato badarai-darai, awak surang diri samiang, jo sia ka barundiang, jo sia ka batutua.
Tabik di nyo agak-agak, takana dinyo kiro-kiro, io di Puti Kasumbo, bajalan Puti Kasumbo. Antaro sapambaean, ditinggakannyo kakaknyo. Takana dinyo cincin tu, awaknyo manaruah cincin, manaruah cincin cinto-cinto, pacinto korong jo kampuang, pacinto ameh jo perak, pacinto di rumah nan gadang.
Ditariaknyo cincin nan tun, dicintokannyo ka rumah, dicintokannyo ka kampuang.
Lah buliah nan kahandaknyo, lah sampai nan dimakasuiknyo, tadiri kampuang jo halaman, tadiri rumah jo tango, langkok jo bareh jo padi, langkok jo alaik pakaiannyo.
Sanang sakaciak di hatinyo, diamlah inyo di rumah tu.
Lah sahari duo hari, lah sampai garan tigo hari, lah ampek hari ka io,  awaknyo diam di rumah, lah jago Si Ali Amat.
Io Si Ali Amat, dicaliak kiri jo kanan, dipandang hilia jo mudiak, tak tampak Puti Kasumbo, manangih Si Ali Amat:
“Kama ko kau lah adiak den, kama ko inyo ka den cari”.
Lalu bajalanlah Si Ali. Lah lamo bakalamoan, lah sasek ka kampuang urang – ka kampuang Puti Kasumbo.
Lah tibo tangah halaman, dihantam-hantamkan kaki, dilantuang-lantuangkan cibuak, manjanguah Puti Kasumbo.
Bakato Si Ali Amat :
“O amai nan punyo rumah, bari luruih den batanyo, bari tarang den batanyo. Lai lah urang nan sasek, io ka rumah amai nangko, Puti Kasumbo namonyo”.
Bakato Puti Kasumbo:
“Tuan janyo den di tuan, kok tanyo ka den bari luruih, kok tanyo ka den bari tarang. Tuan ka rumahlah tuan”.
Ka rumah Si Ali Amat, lah duduak ka ruang tangah, disanduakannyo nasi,  diasokannyolah kupi.
Bakato Si Ali Amat:
“Indak den auih di kupi, indak den litak di nasi, bari luruih den batanyo, bari tarang den batanyo, lailah urang nan sasek kamari, Puti Kasumbo namonyo?”
Manjawek Puti Kasumbo:
“Kok batanyo lapeh payah, kok barundiang sudah makan, makanlah tuan daulu!”
Lah makan Si Ali Amat, tak lalu nasi dimakan, tak amuah aia diminum. Nasi dimakan raso sakam, aia diminum paik-paik, dek susah di dalam hati.
Sudah makan sudah minum, bakato Si Ali Amat:
“Kok makan lah ubek litak, kok minum lah ubek auih, bari tarang den batanyo,  bari luruih den batanyo”, katanyo Si Ali Amat.
Manjawek Puti Kasumbo:
“Indak elok urang parusuah, urang parusuah lakeh tuo, urang pahibo jauah hati, urang panangih bileh mato” katonyo Puti Kasumbo.
Bakato pulo hanyo lai:
“Alah tatakok di nan io, indak tatakok di nan bukan. Kakak den Si Ali Amat, awak den nan adiak kakak, banamo Puti Kasumbo.
Le maso kakak lalok, den aso kakak lah mati, den jagokan tak amuah jago. Takana di den agak-agak, lai cincin nan taiso, den cinto rumah gadang, den cinto kampuang halaman, tadiri itu sadonyo. Ikolah rumah nan tacinto, ikolah kampuang nan den cinto”.
Lah sanang hati Si Ali, lah sirah molah mukonyo.
Tabik dinyo agak-agak, takana molah kiro-kiro, bakato Si Ali Amat, ka bakeh Puti Kasumbo:
“Adiak den Puti Kasumbo, kunun rumah kan lah ado, kunun kampuang kan lah buliah, lai juo cincin nan tun kau andokan?”
Manjawab Puti Kasumbo:
“Kunun lah cincin ditanyokan, kama pulo ka painyo”.
Bakato SI Ali Amat:
“Bao lah kamari cincin nan tun, kito cinto molah rangkiang, kito saru bareh jo padi”.
Io di Puti Kasumbo, dibarikannyo cincin nan tun. Ditariak cincin di Si Ali, dibaka kumanyan putiah, diasok molah cincin nan tun, dicintonyo rangkiang gadang,  disaru bareh jo padi.
Lah ado itu samonyo, lah sanang hati Si Ali, lah lalok tidua Puti Kasumbo.
Lah lamo bakalamoan, lah panjang bakalalaian, Allah Ta’ala manggarakan, lah ngalu Puti Kasumbo.
Bakato Puti Kasumbo:
“Kakak den Si Ali Amat,
Hujan nan tidak labek amek,
Tumbuah tindawan di kukuran,
Sakik nan tidak sangaik amek,
Hancualah lapiak katiduran”.
Bakato pulo anyo lai:
“Kakak den S Ali Amat, babadan marasoi sakik, banyao marasoi mati. Pacik pitaruah arek-arek, pacik pitaruah taguah-taguah, jan kakak lupo-lupokan, rago lidah balun kalu, rago mato balun rabun, kok talingo balun pakak, kok molah mulo ka mo den mati, mati kok dikayai aja, kok pendek hanyo umua den, kok sampai hanyo umua den, pacik pitaruah arek-arek.
Kakak kok ka bajalan, kok sampai mati awak den, kok rumah ka kakak jua, kok kapuak ka diurak, kaban den jan dilupokan, talatak di dalam biliak”.
Manjawab Si Ali Amat, aia mato badarai-darai:
“Diak kanduang Puti Kasumbo, kok lah bak nan tun janyo adiak, ka ba a janyo den pulo”.
Lah lamo bakalamoan, lah mati hanyo Kasumbo, lah sampai hanyo hukumnyo, lah pendek  hanyo umuanyo.
Manangih Si Ali Amat, dek rusuah di dalam hati. Dipunta hanyo kiro-kiro, hukum sampai sukatan panuah, indak buliah ditambah lai.
Babadan manaruah sakik, banyao marasoi mati, lalu ditanam hanyo lai. Dimintakan doa salamaik, sapanjang adat bakampuang, sapanjang adat banagari.
Nak lakeh samianglah juo, dareh mak nyo kunjuang sampai, acok mak nyo kunjuang tibo, lah sampai duo kali tujuah, bamanuang Si Ali Amat:
“Pado iduik bacamin bangkai, elok mati bakalang tanah. Elok den panggang rumah nangko, ka a gunonyo di den lai”.
Dicari molah tu pusuang, dibaka molah tu rumah, tidak katauan nan ka maunyi, Puti Kasumbo lah mati. Api to amuah mamakan, bamanuang Si Ali Amat:
“Ba a ko mungko bak nangko, mungko api tak amuah mamakan”.
Tabik pulo agak-agak, takana pulo kiro-kiro, Puti Kasumbo bapitaruah:
“Kok molah mulo kamonyo, kok sampai hanyo hukumnyo, kok pendek hanyo umuanyo, kabannyo jan dilupokan, bak nan tun kato Kasumbo”.
Dihantamkannyo pintu biliak, lah masuak ka dalam biliak, basuo molah tu kaban,  dibao molah kalua, kalua ka tangah padang, kan tidak disilau-silau, bak nan tun kato Kasumbo.
Dibaka molah tu rumah, kaban lah sudah tabao, rumah lah anguih sakali.
Bajalan molah Si Ali, manjaguak ka pasa rami, lah naiak inyo ka rumah urang.
Sudah makan sudah minum, io moh di rumah urang, tabik dinyo agak-agak,  takana dinyo kiro-kiro:
“Ka parintang-rintang rusuah, elok den bajalan-jalan. Kok tingga di kampuang nangko, hati rusuah batambah risau, tampak-tampak roman Kasumbo”.
Bakato Si Ali Amat:
“O kakak nan punyo rumah, awak den nak bapitaruah, lai ka buliah di kakak?”
Bakato rang punyo rumah:
“Kunun adat urang balapau, kaleknyo mamacik pitaruah” katonyo nan punyo rumah.
Mandanga kato urang lapau, dibarikannyo ka bakeh rang punyo rumah.
Bakato pulo anyo lai:
“Kaban den usah disilau, kaban den usah dibukak, antah sahari den bajalan, antah sapakan lai lambeknyo” katonyo Si Ali Amat.
Bakato rang punyo rumah:
“A kolah  isi kaban nangko, bari luruih den batanyo, bari tarang den batanyo” katonyo rang punyo rumah.
Manjawab Si Ali Amat:
“Simpan samianglah daulu, kudian buliah disilau”.
Io di urang punyo rumah, diandokannyo kaban nan tun, io mo ka dalam biliak.
Bajalan Si Ali Amat, bajalan mamadang-madang, masuak rimbo kalua rimbo,  masuak padang kalua padang, masuak kampuang kalua kampuang, ka parintang-rintang rusuah.
Alah sahari inyo bajalan, alah duo hari inyo bajalan, lah sapakan li lamaonyo,  indak juo rusuah tarintang, tidak takana kaban Kasumbo.
Kaba baraliah anyo lai, ka bakeh rang punyo lapau. Alah sahari duo hari,  alah sapakan duo pakan, indak urang kambali juo, urang nan bapitaruah kaban.
Bamanuang nan punyo lapau:
“Sialah urang bapitaruah, indaknyo kambali lai. Lah mati garan awaknyo, elok disilau pitaruahnyo, anjo den silau kabannyo, anjo den bukak kabannyo”.
Ditariak ka dalam biliak, dibukak molah tu kaban, kaban talatak dalam biliak, ado baisi budak ketek.
Tidak tabedo elok paja, mambayang-bayang ka langik. Ka langik babayang hijau,  ka dunie mambayang kuniang. Mahalah rajo ka judunyo, mahalah puti samo gadang.
Di urang nan punyo rumah, dibari minum jo makan, dibari kain jo baju.
Lah cadiak garan tu paja, gadang bak diamba-amba, tinggi bak dianjuang-anjuang, lah tahu turun ka rumah.
Bakato rang punyo rumah:
“Adiak den si budak ketek, sia kolah amai kau, sia kolah bapak kau?”
Bakato si budak ketek:
“Indak den baibu bapak, indak bamamak baniniak. Amailah ibu bapak den,  amailah niniak mamak den”.
Bakato rang punyo rumah:
“Adiak den si budak ketek, adiak kok ka den bari nasi, adiak kok ka den bari aia, pailah adiak manjamua, tungguilah jamua di kau!”
Io di budak ketek, pailah inyo manjamua. Sacotok jamua di ayam, sapuluah panggalan lakek.
Di urang nan punyo rumah, lah banci molah hatinyo, lah pasai inyo manggadangkan.
Di urang nan punyo rumah, digantangnyo molah sakuih, diserakannyo ka hilalang.
Bakato rang punyo rumah:
“Pailah piliah sakuih adiak, adiak kok ka den bari nasi, adiak kok ka den bari air!”
Bajalan si budak ketek, pai mamiliah sakuih, ka dalam hilalang gadang.
Usah ka usak, kanduik sakuih nan dipiliahnyo.
Lah lamo bakalamoan, awaknyo basarang gadang, aka batambah batukuak,  tabik dinyo agak-agak, takana dinyo kiro-kiro, di urang nan punyo rumah. Dicarinyo gatah cubadak, dilumarinyo paja nan tun, lah bakoreang-koreang samiang.
Dek lamo bakalamoan, lah pulang Si Ali Amat, io mo ka lapau cako. Lah tibo inyo di rumah nan tun, bapantun si budak ketek:
“Gadanglah aia di marabau,
Muaro di pukek urang,
Gadang nan bak gadang kabau,
Bicaro di sukek urang.

Mamak den nan tak bahati, mamak den nan tak balimpo, indak mamacik pitaruah” katonyo si budak ketek.
Io di Si Ali Amat, indak didanga di talingo, disangko anak sia-sia, anak kaciak bakato-kato.
Minum makan Si Ali Amat, lah sudah inyo minum makan, indak katauan nan ka dituruik, hati nan samak-samak rusuah, di ma duduak di ma bamanuang.
Io di si budak ketek, tabik di nyo agak-agak, takana di nyo kiro-kiro, pai nyo bamain-main, pai nyo ka tapi lauik, pai manimbo-nimbo aia, rintang mangali-ngali kasiak.
Di hari sahari nan tun, lalulah urang manggaleh, inyo ka pai balaia.
Bakato si budak ketek, kabakeh urang sudaga:
“Tuan den urang sudaga, tuan kok ka pai balaia, tolong juo den di tuan. Kok suko tuan bajariah, kok amuah tuan manolong, ukua sabulan dalam biduak, ukua sabulan palayaran, kok Allah lai manolong, sahari sajo tuan sampai. Ukua sabulan jua-bali, jangko sabulan baniago, sahari sajo lah abih”.
Bakato urang sudaga:
“A lah kolah pitaruah adiak, a ko lah pasan adiak. Kok lakeh kami sampai, kok batua kato adiak, kami carikan kahandak adiak. A ko lah nan di hati adiak”.
Bakato si budak ketek:
“Tuan den urang sudaga, asa lai amuah tuan mambao, io mo mak den katokan.
Lailah buah sabuah, banamo buah sikaco, io li tumbuah di tangah lauik basa, di suok jalan ka pai, di kida jalan ka pulang, tasunguah ka pintu biduak. Batangnyo sagadang banang, buahnyo sagadang gantang, daunnyo saalai sajo, buahnyo sabuah samiang. Tuan ambiaklah buah nan tun, tuan pajariah papayahkan”.
Bakato urang sudaga:
“Kok bak nan tun kato adiak, amak den kana-kana molah”.
Bakato si budak ketek:
“Asa lai ka tuan bao, den nanti juo di siko”.
Bajalan urang balaia, lah masuak urang sudaga, io mo pai babiduak, biduak lah manduo-duo.
Jangko sabulan palayaran, sahari sajo lah sampai, lah tibo diparantian, lalu dibongka molah biduak, bakadai urang sudaga.
Pado maso duwaso itu, indak tabedo banyak urang, io mo datang mambali. Ukua sabulan jua-bali, sahari samianglah putuih. Lah suko urang sudaga, lah sanang dalam hati.
Dimuek pulo molah biduak, lah sudah biduak tamuek, lalu dikayuah molah biduak. Tibo di tangah lauik basa, dikayuah lalu tak amuah, dikayuah suruik tak buliah. Biduak lah managun samiang.
Tamanuang urang sudaga, a kolah iko sababnyo, mungko biduak bak cando nangko. Manjanguah inyo pintu, io mo urang sudaga, tampaklah batang sabatang, buahnyo sagadang gantang, batangnyo sagadang banang, daunnyo saalai sajo.
Tabik di nyo agak-agak, takana dinyo kiro-kiro, io pasan si budak ketek,  mangkahandakan buah kaco. Io li iko molah nan talampaui, mungko biduak tak amuah bajalan.
Bawari urang sudaga, diambiak molah tu buah, disimpan ka dalam biduak, dicubo pulo mangayuah biduak, biduak lah manyorong-nyorong, indak sataro bakayuah.
Lah lamo bakalamoan, lah panjang bakalalaian, lah tibo di tapi pasia,  dibongka pulolah barang, si budak ketek mananti juo.
Bakato si budak ketek:
“Tuan den sudaga, ado pitaruah den tuan bao, ado buah den tuan ambiak, awak den mananti juo”.
Katonyo urang sudaga:
“Lai den bao buah kau, lai den pacik pitaruah kau”.
Io di urang sudaga, dibarikan kain nan rancak, dibarikan pitih banyak-banyak, ka anjik si budak ketek.
Bakato si budak ketek:
“Tuan den urang sudaga, indak den arok di pitih, indak den nak buliah kain, asa lai buah den dibao, labiah bak tuan bari pitih, labiah bak tuan bari kain”.
Lah panek gigiah bagigiah, lah payah tangka batangka, indak yo namuah manahiak.
Bakato si budak ketek:
“Tuan den urang sudaga, kok tuan nan baragiah juo, asa lai den sarila-rila tuan, barilah kain bujua sangka, ka pandukuang-dukuang buah”.
Bawari urang sudaga, pitih dibari to nyo namuah, kain dibarikan to diamuahkannyo.
Dibarikan kain bujua sangka, ka anjik si budak ketek. Dibarikannyo buah nan tun,  io di urang sudaga, ka bakeh si budak ketek.
Bakato si budak ketek:
“Tuan den urang sudaga, ridokan jariah payah tuan, tuan lah payah mambao buah ambo” katonyo si budak ketek.
Bakato urang sudaga:
“Adiak den si budak ketek, rilakan sarila-rilanyo, di muluik sampai ka hati, di awa lalu ka akia” katonyo urang sudaga.
Lah dibao molah buah, didukuang molah tu buah.
Bakato si budak ketek:
“Awai ai awai buah den, sabajajak buah tinggakan, tidak tabedo sakik iduik, bahari-hari to makan, babulan-bulan to minum, batahun-tahun to mandi” nyanyinyo si budak ketek.
Bajalan juo awaknyo, ka bakeh mamaknyo cako. Jauah bak raso di jalan, hampiang bak raso ka tibo.
Lah sampai molah garangan, lah tibo molah ka io, ka bakeh mamaknyo cako.
Banyanyi si budak ketek:
“Awai ai awai buah den, sabajajak buah tinggakan, indak tabedo sakik iduik. Mamak den nan tak bahati, mamak den nan tak balimpo, tidak mamacik pitaruah.
Gadanglah aia di marabau,
Muaro dipukek urang,
Gadang nan bak gadang kabau,
Bicaro di sukek urang” katonyo si budak ketek.
Bakato Si Ali Amat:
“Adiak den si budak ketek, anjo den silau buah ko, anjo den caliak buah ko”.
Manjawek si budak ketek:
“Mamak den janyo den di mamak, usah disilau buah den, usah dicaliak buah den. Kok diawai rasan tangan, kok dicaliak rasan mato, mamak janyo den di mamak”.
“Adiak den si budak ketek, buliah den liek buah ko, apo kahandak mak den bari, kok kain amak den bari, kok nasi amak den bari, den carikan ka pamenan kau, asa amuah adiak den silau” katonyo Si Ali Amat.
Manjawek si budak ketek:
“Mamak janyo den di mamak, kunun ka disilau buah den, kunun ka diliek buah den, anta den pai mandi, ka luhak11 barayun kuniang, larangan Puti Kasumbo, di sinanlah mamak silau, di sinanlah mamak liek.
Sabuah lai di mamak, kok hanyo buah ka disilau, kok hanyo buah den ka diliek, baolah limau sauleh, bakalah kumanyan putiah, pasanglah niek jo kaua, kunun ka dibalah buah den”.
Bakato Si Ali Amat:
“Kok lah bak nan tun janyo adiak, den cari molah tu limau”.
Bawari Si Ali Amat, dicari molah tu limau. Lah dapek limau dicari, lah dapek kumanyan putiah. Hari nan sadang tangah hari, sadang litak-litak anjiang, sadangnyo langang urang di pakan.
Bakato Si Ali Amat:
“Adiak den si budak ketek, to molah pai ka sinan, ka luhak badayun kuniang”.
Manjawek si budak ketek:
“Ko lah hasia nan kahandak den, kito pailah kini nangko”.
Bajalan Si Ali Amat, baduo jo si budak ketek, ka luhak11 badayun kuniang, lah sampai inyo ka kiun.
Bawari si budak ketek, hari nan sadang tangah hari, sadang litak leto alu, sadangnyo rami urang di pakan, sadangnyo langang rang di labuah, dilimaukannyolah limau.
Lah sudah inyo balimau, lah mandi anyo lai. Sadiruih inyo mandiruih, salampih daki tabuang. Cukuik kaduo inyo mandiruih, tidak tabedo elok umaik. Mahalah rajo ka jompaknyo, mahalah puti samo gadang. Tidak tabedo elok umaik, ka langik mambayang kuniang, ka gumi mambayang hijau, io mo si budak ketek.
Lah sudah molah inyo mandi, bakato Si Ali Amat:
“Adiak den si budak ketek, anjo den silau buah ko, anjo den liek buah ko”.
Bakato si budak ketek:
“Mamak janyo den di mamak, buah den kok ka diliek, buah den kok kadisilau, pailah mamak salang rencong, ka rumah Aciak Nan Gambun, kami li saluak sasaluak. Awaknyo anak inyiak den, awak den anak mamaknyo”.
Bawari Si Ali Amat, indak urang nan ka disuruah, indak urang nan ka disarayo. Bajalan Si Ali Amat, pai manyalang rencong nan tun. Si budak ketek di luak mananti Si Ali Amat.
Bawarilah Si Ali Amat, bagageh-gageh di jalan, baguluik-guluik awaknyo. Barang tarewai lah tarewai, barang takaca lah takaca. Karewai garabak hantam, tabao karakok camin. Balari-lari inyo di jalan, talantuang alu patah tigo, samuik tapijak tidak mati, talua tataruang tidak pacah.
Lah lamo maso di jalan, dakek bak raso ka tibo, jauah bak raso di jalan, lah tibo molah ka io, lah sampai molah garangan.
Lah tibo di halaman Nan Gambun, dihantam-hantamkan kaki, didantuang-datuangkan cibuak. Manjanguah Aciak Nan Gambun, manjanguah di pintu gadang, Nan Gambun sadiang baminyak, sadang malantak lantua jari, sadang mandanciang-danciang kuku, sadang manyangak-nyangai gigi.
Bakato Si Ali Amat:
“Kakak den Aciak Nan Gambun, lai ko lah kau di rumah”.
Jawek Aciak Nan Gambun:
“Ba a den tak ka di rumah, sadang bak nangkolah hari”.
Ka rumah Si Ali Amat, bawari Aciak Nan Gambun, ditariak siriah di carano, diantakan bakeh Si Ali, alah bakato anyo lai:
“Ba a tuan tasusuak bana, a bana nan di angan, a bana nan dimukasuik, mungko tuan sasek kamari?”
Bapantun Si Ali Amat:
“Bukan den katari samiang,
Ado bedo jo rang Talang,
Bukan den kamari samiang,
Ado mukasuik nan den jalang.

Awak den nak manyalang rencong, disuruah si upiak ketek, ado ka gunonyo di nyo, io ka pambalah buah, buah camin si upiak ketek”.
Manjawab Aciak Nan Gambun:
“Lai den manaruah rencong, indak awak den nan punyo. Rencong den rencong pusako, dari ninik turun ka mamak, dari mamak turun ka bakeh den, utang den mamakai sajo”.
Bakato Si Ali Amat:
“Kok bak nan tun bana janyo aciak, pintak den nak dibari juo, kahandak nak  balaku juo. Mungko bak nan tun janyo den, awak den disuruah si upiak ketek. Dikatokannyo bakeh den, pailah mamak ka kian, ka rumah Aciak Nan Gambun, salanglah rencong sabuah. Kunun jo Aciak Nan Gambun, awak den saluak samaluak, awaknyo anak inyiak den, awak den anak mamaknyo. Bak a tak ka buliah manyalang, bak nan tun janyo bakeh den”.
Bakato Aciak Nan Gambun:
“Kok bak nan tun janyo tuan, ka bak apo lah janyo den. Rencong den kok ka dibao, den kusuak molah daulu, den asok molah daulu” katonyo Aciak Nan Gambun.
Bawari Aciak Nan Gambun, lah tagak anyo lai, dibukak candonyo kunci, mandanguang tali bubutan, duo tigo kunci nan jatuah.
Dibao rencong kalua, kalua ka tangah rumah. Dikusuakinyo rencongnyo, dilimauinyo rencongnyo.
Bakato Aciak Nan Gambun:
“Tuan den Si Ali Amat, kok rencong den ka dibao, kok ka dibalahkan rencong den, pacik pitaruah arek-arek, usah dilupo-lupokan.
Apo basuo dalam buah, kok padusi nan basuo, namokan Puti Kasumbo, ka lawan den samo gadang, ka kawan den hilia jo mudiak.
Kok laki-laki nan basuo, namokan Si Tungga Kayo. Kaciak banamo Nan Tungga,  gadang banamo Magek Jabang”.
Manjawek Si Ali Amat:
“Kok bak nan tun janyo Aciak, ka ba a janyo den pulo, amak den pacik arek-arek.
Iko siriah kunyahlah pinang, isoklah iko santo, ambo ka bajalan anyo lai, harilah barimbang tinggi, si upiak nanti-nantian”.
Bawari Aciak Nan Gambun, dikunyah molah tu pinang, sari lamak jatuah ka paruik, sari manih tingga di bibia, di bibia Aciak Nan Gambun.
Lah sudah kunyah mangunyah, lah sudah isok-maisok, bakato Si Ali Amat:
“Lapeh baelok den daulu, lapeh jo hati nan cuci, lapeh jo muluik nan manih, amak den babaliaklah daulu, amak den antakan rencong nangko, ka bakeh si budak ketek”.
Bajalan Si Ali Amat, ka bakeh si budak ketek, ka luhak badayun kuniang, ka luhak larangan urang, bagageh-gageh di jalan, balari-lari awaknyo, paluahlah gubang kabayan. Batitiak-titiak paluahnyo, jatuah duo jatuah tigo, bak maniak putuih talinyo, bak intan putuih pangarang.
Jauah bak raso di jalan, dakek bak raso ka tibo, lah sampai molah garangan, lah tibo molah ka io, di luhak badayun kuniang.
Lah sampai molah ka kian, ka bakeh si upiak ketek, inyo mananti-nanti  juo.
Bakato si upiak ketek:
“Gadanglah aia di marabau,
Mua dipukek urang,
Gadang nan bak gadang kabau,
Bicaro disukek urang.

Paruik nan bak paruik rotan,
Dirauik bajelo-jelo,
Paruik nan bak paruik setan,
Sakaciak tak bakiro-kiro”.
Lah sudah inyo bapantun, lah sudah inyo banyanyi, bakato si upiak ketek:
“Mamak jo den di mamak, jadi disalang koh rencong, jadi dibao tu rencong, io rencong Aciak Nan Gambun, laikoh buliah manyalang?” katonyo si upiak ketek.
Bakato Si Ali Amat:
“Adiak den si upiak ketek, ko tu rencong lah den bao, ko tu rencong lah den salang, bo lah kamari buah kau, mak den balah jo rencong nangko”.
Bakato si upiak ketek:
“Mamak jo den di mamak, kok dibalah buah den, usah mamak guluik sajo. Limaui daulu buah nangko, asoki daulu buah nangko”.
Bawari Si Ali Amat, diambiak molah tu buah, dilimaui molah sakali, dibaka kumanyan putiah, diasoki anyo lai.
Lah sudah buah talimaui, lah sudah buah taasoki, bakato si budak ketek:
“Mamak den jo den di mamak, kok buah den ka dibalah, elok-elok mambalahnyo, baiak-baiak manuriahnyo, jan kanai isinyo baiko”.
Bakato Si Ali Amat:
“Kok lah bak nan tun janyo adiak, ka ba a janyo den pulo”.
Bawari Si Ali Amat, dibalah molah buah tu. Sakali inyo manuriah, lah balah molah tu buah, kalua Puti Kasumbo, io mo di dalam buah.
Bakato Puti Kasumbo:
“Kakak janyo den di kakak, kakak den Si Ali Amat.
Sajak samulo den katokan,
Tidak dilatak dalam padi,
Sajak samulo den katokan,
Tidak dilatak dalam hati.
Dangalah mak den curaikan, dangalah mak den katokan. Maso kito di dalam rumah, maso badan den ka sakik, bapitaruah den bakeh kakak, kok molah mulo ka mo den mati, kok dikayai aja, babadan marasoi sakik, banyao marasoi mati, kok sampai hanyo hukum den, kaban den jan dilupokan, bak nan tun juo janyo den.
Sasa den nan to ka abih, upek ka sapanjang hari, kakak indak mamacik pitaruah” kato Puti Kasumbo.
Bakato pulo Puti Kasumbo:
“Kakak den Si Ali Amat, to kito pai ka kampuang, a molah pulang ka rumah, sia ko lah marewai rumah, di sia kakak pitaruahkan.
Salamo den tinggakan, lai juo kakak unikan?”
Manjawek Si Ali Amat:
“Adiak den Puti Kasumbo, baru adiak lah mati, rumahlah dikaronyo lawah, rumahlah tacanguah samiang. Tabik di den agak-agak, pado den baputiah mato, elok den panggang rumah nan tun. Jadi den panggang anyo lai, tidaknyo amuah anguih. Takana di den pitaruah adiak, ditariak kaban ka biliak.
Lah sudah kaban den tariak, den panggang sakali lai, barunyo anguih rumah nan tun, awak den bajalan anyo lai.
Den pitaruahkan kaban nan tun, den pai bajalan-jalan, masuak rimbo kalua rimbo, paubek hati nan rusuah, ka parintang-rintang hati. Raso ka pasiak badan den, raso ka gilo badan den, tagah umua den ka panjang.
Lah babaliak den bajalan, basuo den si upiak nangko, inyo banyanyi-nyanyi kaciak, inyo bapantun ciek-ciek, tadayuah-dayuah di hati den, tahibo-hibo hati den. Inyo mandukuang-dukuang buah, lalu den imbau den tanyoi.
Den bao inyo kamari, sampai den balah buah nan tun, kironyo adiak di dalam”.
Namun di maso nan tun, banyak rundiangan jo paparan, samo kalua aia mato.

Dek lamo bakalamoan, takana di nyo agak-agak, tabik di nyo kiro-kiro, io di Si Ali Amat, disilau candonyo cincin, kan cincin sicinto-cinto, pacinto bareh jo padi, pacinto ameh jo perak, pacinto kampuang halaman.
Dibaka kumanyan putiah, disarukannyo cincin nan tun, dicintokannyo ka rumah, dicintokannyo ka labuah tapian, dicintokannyo rangkiang ranjuang.
Barakaik tuah cincin nan tun, barakaik sati cincin nan tun, balaku itu samonyo. Tadiri rumah nan gadang, langkok jo alat pakaiannyo, langkok jo lumbuang jo kapuaknyo, langkok jo rangkiang ranjuang, langkok jo labuah tapian.
Lah naik inyo ka rumah gadang, baduo jo Puti Kasumbo, batigo jo si upiak ketek. Lah suko di dalam hati, lah sanang raso paratian.
Alah sahari inyo di rumah, alah duo hari inyo di rumah, alah duo hari inyo di rumah, alah sapakan duo pakan, tabik di nyo agak-agak, takana dinyo kiro-kiro, io di Puti Kasumbo.
Bakato Puti Kasumbo:
“Kakak den Si Ali Amat, tatkalo mulak mulonyo, ba a parasaian kito, tatkalo kito ka jauah, tatkalo kito ka laraik, ba a ko lah iko kaonyo, sia kolah amai kito, sia kolah kakak kito, samaso daulunyo.
Kito tacelak tampak jauah, nan dakek jolong basuo, bakeh rang suka mahandok, bakeh urang mikin mamintak, lai bak nan tun hanyo kito” katonyo Puti Kasumbo.
Bakato Si Ali Amat:
“Tatkalo kito jauah, tatkalo kito ka laraik, sabab di rang tuo buruak.
Awak den dipitanahkannyo, awak den diasuangkannyo. Baiokan di amai kito, babanakan di amai kito. Berang bangih inyo bakeh den, bak nan tun asal mulonyo, bak nan tun daulunyo”.
Bakato Puti Kasumbo:
Io bak pantun janyo urang:

“Hai kubang nan tak barongkeh,
Ka mananti rogek juo,
Rogek ka badaun-daun,
Kakak den nan tak baameh,
Ka mananti ka laraik juo,
Laraik ka batahun-tahun.
Kakak den Si Ali amat! Nan tak disilau lah diliek, nan tak diliek lah basuo, lah banyak parasaian nan ditangguang.
Kok rumah kan lah buliah, kok padi alah di kapuak, kok ameh alah di puro, kunun hati kan lah sanang, kunun parasaian kan lah banyak.
Amai kito ba a ko lah kini, kok lah lunak hati nan kareh, kok lah suruik bakeh nan bana”.
Sarago baetong-etong, sarago bapacah-pacah, lah datang molah tu urang, io mananyokan padi.
Bakato urang di halaman, io mo Si Linduang Bulan, Si Ramin Judin nan surang, didatuang-datuangkannyo cibuak.
Manjanguah Puti Kasumbo, bakato urang mambali padi:
“O kakak jo den di kakak, laikoh bajua padi, kami nak mambali padi”.
Bakato Puti Kasumbo:
“Amai ka rumahlah amai, kunun padi ditanyokan, antah lai antah tidak, ka rumah daulu mangunyah”.
Ka rumah molah tu urang, lah timbang salo manyalo, lah batimbang kaduik jo kampia, bakato rang mambali padi:
“Kakak janyo den di kakak, pajua lai jualah padi. Kok tak buliah banyak-banyak, sakaciak sajolah jadi. Bapakan-pakan tak makan, babulan-bulan tak minum” katonyo rang mambali padi.
Bakato Puti Kasumbo:
“Kok padi ka den kauik, bari luruih den batanyo, bari tarang den batanyo, di ma ko lah iko kampuang amai?”
Manjawab molah tu urang:
“Kunun kampuang den ditanyokan, kunun nagari ditarangkan, rumik den manarangkannyo.
Dangalah mak den katokan, dangalah mak den curaikan.
Kunun maso daulunyo, takadia Allah iko di kami. Kayo den sunduik basunduik, gadang den asa barasa” katonyo rang mambali padi.
“Indak bak kayo rang kini, kununlah gadang rang kini, kununlah kayo rang siko. Gadang diamba Ulando, kayo jo ameh sunduikan, takah iko kabagiaan kami.
Kabau den tayok12 di padang, itiak tayok di baluka, ayam banyak di halaman, parapati linduang jo awan, rumah gadang sirangko gadiang, salanja kudo balari, sapakiak budak maimbau. Rangkiang mangaki jawi, kapuak kaciak salek samalek, di tangah sibayau-bayau, makanan dagang nan lalu” katonyo rang mambali padi.
“Kunun maso daulunyo, jaranglah urang nan bak den. Kabau den banyak di padang, Si Ali Amat nan gubalo.
Tatkalo kami bak nangko, hari baribuik wakatu Asa, Si Ali mamasuakan kabau, maimbau tangah halaman.
Bak nan tun janyo bakeh den, amai janyo den di amai, jawek juo sambang dadiah den, kabau den alun basawar, nan kaciak alun bakungkuang.
Bapakak samiang awak den, manangih Si Ali Amat, ba a ko lah iko amai den, paruik ko lah nan umayang, kapalo ko lah nan ngalu, kapatang indak bak nangko.
Mareh-mareh awak den, ka bakeh Si Ali Amat, banyaklah kato den katokan. Bakiroklah ang di siko, urang basibidai takirok, urang basiabu ateh tunggua, uwia-uwia manangeh jamua.
Mandanga kato den nan tun, manangih Si Ali Amat, bajalan samiang awaknyo, manuruik pulo adiaknyo.
Kini to pulang-pulang lai, antah kama-kama awaknyo, sajajak ditinggakannyo. Kami manangguang parasaian, tatkalo kami ka bak nangko”.
Bakato Puti Kasumbo, bakato sambia manangih, Si Ali bamanuang samiang:
“Dangalah mak den tutuakan, dangalah mak den curaikan” katonyo Puti Kasumbo.
“Tatkalo kami ka jauah, tatkala kami ka laraik, adolah urang tuo buruak, urang paujah-paejoh, nan maasuang amai kami.
Dangalah mak den curaikan, dangalah mak den tutuakan.
Tatkalo maso daulu, adolah urang tuo buruak, maasuang-asuang amai kami, dipujinyo diupeknyo disanjuangnyo, di urang tuo buruak.
Bak nan tun janyo bakeh den, sia tu urang, di padang taluah lui (?), di bukik tandai langkuduang, di bawah baringin ameh, di tapi labuah nan gadang, kok anak ko to kok ukan, bak nan tun janyo bakeh den, rumah nan dirungkuik labu, di rangkiang nan tajongkang, dijunjuang siriah nan rabah, di sinan rumah amai den, pitanah urang tuo buruak.
Itu mulo kami ka bajalan, itu mulo kami ka laraik, kami pai ka rimbo gadang, Allahu robbi parasaian. Bapakan-pakan to makan, babulan-bulan to minum, mo li rimbo lah taturuik, mo li bukik lah tadaki, mo li padang lah tatampuah. Satangah ula nak malulua, satangah harimau nak mamakan, rang manyamun nak mambunuah, kunun maso daulunyo” katonyo Puti Kasumbo.
“Dangalah mak den curaikan, dangalah mak den katokan.
Kami baduo baradiak, Si Ali Amat kakak den, Puti Kasumbo awak den, io dibuang amai den, amai den Si Linduang Bulan, nan surang Si Rumin Judin” katonyo Puti Kasumbo.
Baharu mandanga kato Kasumbo, manggaruang Si Linduang Bulan, manangih Si Rumin Judin, rauangnyo sarauang-rauang, tangih taisak-isak.
Bakato Si Linduang Bulan:
“Kok io adiak Kasumbo, kok io Si Ali ka nan surang, ikolah anak kanduang den” kato rang mambali padi.
Maisak-isak inyo manangih, didamuak dado nan jajai, bakasan jari nan limo, anam jo patahan cincin.
Manangih Puti Kasumbo, manunu Si Ali Amat.
Bakato Puti Kasumbo:
“Dangalah mak den katokan, kok io amai nan Si Linduang, kok io amai nan Si Rumin, ba a bana daulunyo?”
“Tatkalo anak ka jauah” bakato Si Linduang Bulan.
“Kunun maso daulunyo, kan lah sudah den katokan, karano di urang buruak. Awaknyo bajua sadah, sadahnyo sakupang ganok, sapitih to amuah labiah, sarimih to amuah kurang, sakupang samiang sadahnyo.
Nyak lakeh samianglah juo, acok mak nyo kunjuang sampai, dareh mak nyo kunjuang tibo, sudah den bali sadahnyo, den bilankan pitih limo kupang. Nan sakupang bali sadah, nan saameh den baragiah.
Indak nyo amuah manariak, sakupang samiang sadahnyo.
Lah panek gigiah bagigiah, lah panek tangka batangka, den buhuakan ka kainnyo, ka kodek ka jumbai alai, ka kain rang tuo buruak.
Lah bajalan rang tuo, tagak di pintu ka rumah, lah disanjuangnyo dipujinyo. Sungguah manyanjuang rang tuo, padahan malalukan pitanah.
Bak nan tun janyo bakeh den, to rumah saelok nangko, to rumah sabaiak nangko, gonjongnyo rabuang mambacuik, parannyo ula mangulampai, tuturan labah mangirok, tagah caceknyo li sabuah.
Sia tu urang tu urang, kok anak ko to kok ukan, di tapi labauh nan gadang, di kayu bapucuak sirah, Si Ali Amat namonyo.
Awak den batanyo bakehnyo, nan ma na rumah Si Linduang, nan ma nan kampuang Si Rumin.
Katonyo ka bakeh den, di rumah nan dirungkuik labu, di rangkiang nan tajongkang, di junjuang siriah nan rabah, di sanan rumah Si Linduang.
Tabik bangih hati den, tabik berang di hati den, banyaklah kato nan den katokan, banyaklah rundiang den rundiangkan, kabakeh Si Ali Amat, itulah bana sababnyo, tatkalo anak ka bajalan” katonyo Si Linduang Bulan, kabakeh Puti Kasumbo.
Bakato Puti Kasumbo:
“Amai janyo den di amai, amai pamacik pitanah, amai paiokan asuang urang. Awak den lah nan Kasumbo, nan ikolah Si Ali Amat”.
Bakato Si Ali Amat:
“Amai den Si Linduang Bulan, eloklah baragak-ragak, eloklah bakiro-kiro.
Amai janyo amai den di amai, kok io amai kanduang den, abih koh suruik bakeh nan bana. Alah ko lunak hati nan kareh, nyak bapantun den sabuah, danga banalah di amai:
Apo nan merah di carano,
Sakalat labiah urang guntiang,
Dalam diliriah kami tanyo,
Amai sapantun urang asiang”.

Bakato Si Linduang Bulan:
“Anak den Si Ali Amat, anak den Puti Kasumbo, bari maaf den di anak, di muluik sampai ka hati, di awa lalu ka akhia. Kato den banyak nan tadorong, muluik den banyak nan talampau”.
Bakato Puti Kasumbo, kabakeh Si Ali Amat:
“Kakak janyo den di kakak, usah banyak tarang kakak, usah banyak kukuih kakak, tabik hibo paratian, kunun io kan lah io, lah bana iko amai kito”.
Manjawab Si Ali Amat:
“Adiak den Puti Kasumbo, kunun io janyo adiak, ka bukan pulo janyo den”.
Lah lamo bakalamoan, alah sahari duo hari, alah sapakan duo pakan, alah suko hati Si Linduang Bulan, alah sanang hati Si Rumin Judin, lah sanang hati Si Ali, lah suko-suko Puti Kasumbo.
Bakato Puti Kasumbo:
“Kakak den Si Ali Amat, kunun hati kan lah sanang, agak-agak kan lah cukuik, apo nan kahandak kakak, apo nan di hati kakak, ba a iko ka eloknyo.
Amai kito kan lah pulang, si upiak kaciak lah gadang”.
Manjawek Si Ali Amat:
“Adiak den Puti Kasumbo,

Usah diganang di sayak,
Ganang di saok kapuran
Usah dibilang di nan banyak,
Kana di lapiak katiduran” katonyo Si Ali Amat.
“Adiak den Puti Kasumbo, dangalah mak den katokan, kok agak-agak io lah cukuik, kampuang halaman kan lah ado, bareh jo padi kan lah ado, kabau bantiang kan lah banyak, kunun hati lah sanang, amai kito lah basuo.
Kok parasaian kito lah banyak, nan tak dirasai lah dirasai, sabuah anyo nan marusuah, kito urang tabang-tabangan, tidak bakorong bakampuang, indak bakaum kaluargo, jo sia sailia samudiak.
Nan taragak di hati den, nan takilang di mato den, io den nak mamancang galanggang, mak tahu urang di awak, awak mak tahu di urang, kok lai sia jo adiak, kok lai sia jo amai”.
Bakato Puti Kasumbo:
“Kok itu mukasuik kakak, kok itu nan niek kakak, pucuak di cinto ulam tibo, lah io pulo janyo den, indaklah kato ka batupang”.
Lah sudah inyo mupakaik, lah sudah inyo barundiang, diguguah tabuah larangan, badunduang tabuah nan banyak.
Di lurah urang mandaki, di bukik urang manajun,
Tidak tabedo banyak lundang,
Tidak tabuek di daun taleh,
Di daun batuang panuah pulo,
Tidak tabedo banyak urang,

Tidak tabuek di nan laweh,
Di nan lakuang panuah pulo.
Nan buto datang bairik, nan patah datang batungkek, nan gagok teleang-teleangi.
Bakato rang cadiak pandai:
“Apokoh tabuah baguguah, apokoh badia badatuih, di ma anak rando rabuik rampeh, di ma dubalang rabuik rampeh, di ma juaro takuiran, di ma panghulu buliah basa, di ma jojo nan babukik, di ma parik nan basisiak”.
Manjawab Si Ali Amat:
“Manolah urang cadiak pandai, tidak anak rando rabuik rampeh, tidak juaro takuiran, tidak pangulu buliah basa, tidak jojo nan babukik, tidak parik nan basisiak.
Mano urang nan banyak nangko, dangalah nak den katokan, nak den curai den papakan, dangalah mak den tutuakan. Mungko tabuah lah bagua, mungko badia lah badatuih, kami baniek dalam hati, parasian tambah di kami. Kami nak mandoa dalam kampuang, Tolong tolonglah - tolong di rang banyak.
Kok tak ka ditolong jo luli,
Tolong jo ka bantiah kami ba a,
Kok tak ka ditolong jo rugi,
Tolong jo jariah kami ba a”.
Bakato rang cadiak pandai:
“Apo nan kami buek, tunjuakan molah ka jalan”.
Manjawab Si Ali Amat:
“Hai urang nan banyak nangko, asa lai amuah nak manolong, kami nan ka minta doa.
Antaklah tabu di lurah, tabanglah batuang di lakuang, pampanglah kabau nan gadang, urahlah padi di mandah”.
Bakato urang nan banyak:
“Kok lah bak nan tun janyo tuan, ka ba a janyo kami pulo. Kok hanyo tantang jariah payah, usah tuan rusuah sanan, usah tuan gamang sanan, kamilah itu manangguangi”.
Bawari urang nan banyak, nan bakabau lah bapadi, nan babatuang lah batabu, baayun-ayun urang banyak, Si Ali Amat ka baralek.

Lah lamo bakalamoan, lah panjang bakalalaian, kok tabu alah bakilang, kok kayu alah bacari, kok kabau alah bapauik, kok bareh alah batumbuak, galanggang alah babuek.
Bakato urang nan banyak:
“Tuan den Si Ali Amat, kok tabu alah bakilang, kok kayu alah bacari, a lai nan ka kami buek, a lai nan ka kami turuik, tantukan molah di tuan”.
Manjawab Si Ali Amat:
“Kok lah langkok sadonyo, kito lapeh molah kulansiang, kunun alek lah ka lansuang”.
Bawari Si Ali Amat, dilapeh siriah hilia jo mudiak, ka lauik biduak baranang, ka darek urang bajalan, ka langik alang manggungguang.
Lah lamo bakalamoan, lah panjang bakalalaian, alah sahari duo hari, alah sapakan duo pakan, lah sampai ukua jo jangkonyo, lah tantu hari kutikonyo, lah tibo rajo nan banyak, lah datang urang nagari.
Bawari Si Ali Amat, diramikannyo galanggang, indak tabedo banyak urang, indak tabedo rami sabuang. Darah ayam bak pincuran, darah kabau bak pamotong, bakundang-kundang bulu ayam, baayun-ayun urang banyak, babondong-bondong di nagari, Si Ali Amat bagalanggang.
Lah lamo bakalamoan, lah panjang bakalalaian, sadang banyak urang ka balai, harinyo sadang tangah hari, sadangnyo bunta bayang-bayang, sadangnyo rami urang di pakan, sadangnyo banyak urang di labuah, bajalan-jalan Si Ali.
Basuo kayu sabatang, baringin larangan urang, larangan Rajo Kuaso, urang mamancuang tak batanyo, urang mangganang tak jo aia, manggantuang nan tak jo tali. Bataduah Si Ali Amat, di bawah baringin cako.
Adolah urang nan lalu, bakato urang nan lalu:
“Sia koh urang nan bataduah, basigeleang a iko umaik, sagaduak a iko urang, baringin larangan urang, larangan Rajo Kuaso”.
Bapakak samiang Si Ali, awaknyo bataduah juo.
Bawarilah urang lalu, urang kisiak urang kianaik, diimbaukannyo bakeh rajo.
Tibo di rumah Rajo Kuaso, bakato urang nan lalu:
“Ampun Tuanku Rajo kami, nan bana kami katokan, nan io kami imbaukan.
Sia tu urang bataduah, di bawah baringin Tuanku, di baringin nan larangan. Di tagah tidak tatagah, diambek tidak taambek, awaknyo bataduah juo”.
Bakato Rajo Kuaso:
“Sabohong a iko urang, saduto a iko umaik, ka den bunuah urang nangko, ka den bunuah mati-mati, ka den jua jauah-jauah “ katonyo Rajo Kuaso.
Bakato urang nan lalu:
“Ampun Tuanku Rajo kami, dibunuah  kami ka mati, dijual kami ka jauah, digantuang kami ka tinggi, nan bana kami katokan”.
Marentak Rajo Kuaso, dicaliak candonyo karih, alah diasah cando lambiang, dikilia candonyo padang. Balari inyo kalua, kalua ka tangah padang, io ka bawah baringin.
Sapambadian inyo ka tibo, sampabaean inyo ka sampai, lah tampak urang bataduah, di bawah baringin gadang.
Mahariak Rajo Kuaso, merentak Rajo Kuaso:
“Anak sia itu umaik, anak bincacak bincacau, anak singiang-ngiang rimbo, anak sigalang-galang kuduang, anak sicaciang panarahan!”
Bapantun Si Ali Amat:
“Jan baitu tarah papan,
Jauah ka rimbo padi kambi,
Jangan baitu kato tuan,
Jauah hinonyo hati kami.
Bukan den anak bincacak, bukan anak ngiang-ngiang rimbo, ukan anak caciang panarahan. Namo den Si Ali Amat, inyiak den Datuak Bandaharo, amai den Si Linduang Bulan, bapak den Datuak Nan Gadang.
Janganlah bak nan tun bana, jan kato tadorong-dorong, jan muluik talompek-lompek, kok mantang den bak nangko”.
Kini tacangan Rajo Kuaso, lambiang dipacik lalu jatuah, padang diganggam lalu tangga, karih tasisik indak tabukak. Bajalan samiang inyo pulang, io moh Rajo Kuaso.
Lah lamo bakalamoan, lah panjang bakalalaian, lah pulang Si Ali Amat, ka kampuang Puti Kasumbo.
Bakato Si Ali Amat:
“Adiak den Puti Kasumbo, kunun balai kan lah rami, kunun sabuang kan lah lamo, lah asia ko lah ko kini, atau garam nan sacacah, atau lado nan sapipih” katonyo Si Ali Amat, kabakeh Puti Kasumbo.
Manjawab Puti Kasumbo:
“Kakak den Si Ali Amat, kununlah garam dikatokan, kunun lado kannyo murah, paham nan sarik di kito.
Kok bana paham kito, kalau siak jo laruih (?), pabilo kakak lansuangkan, indak batulih dari ambo”.
Bakato Si Ali Amat:
“Adiak den Puti Kasumbo, kalau bak nan tun janyo adiak, lah murah itu di ambo. Nak bapantun den sabuah,

Lah panek maani banang,
Dikumpa-kumpa dilipek,
Dilipek-lipek paduo,
Lah payah marantang panjang,
Dikumpa amaknyo singkek,
Kato mak suruik kamulonyo”.
Katonyo Si Ali Amat, kabakeh Puti Kasumbo.
Alah lamo bakalamoan, hari lah barimbang jauah, dipanggia urang nagari, io mo ka tangah rumah, dipaduduak cadiak-pandai.
Ado sabanta urang duduak, kiro satareko sapitanak13, bakato cadiak-pandai, kabakeh Si Ali Amat:
“Kunun kami kan lah rapek, kok urang alah ka rumah, lai mukasuik dalam hati, lai  nan takilan di mato, eloklah di katangahkan”.
Manjawan Si Ali Amat:
“Mano sagalo niniak mamak, lai nan taraso pado hati, lai nan takilan pado mato. Sungguah bak nan tun janyo ambo, karano tapakai tu di urang, kalau batanyo lapeh payah, kalau barundiang sudah makan. Kito makan molah dahulu, mananti tuan sabanta”.
Bakato Si Ali Amat, ka bakeh Puti Kasumbo:
“Adiak den Puti Kasumbo, mandeh den Si Linduang Bulan, nan surang Si Rumin Judin, sanduaklah nasi Kasumbo, tariaklah kupi Kasumbo”.
Bawari Puti Kasumbo, baguluik-guluik nyo manggulai. Sadangkang batu ladonyo, duo baleh ragam gulainyo. Pangek pario rang Tiaka, randang pacak Aia Tabik.
Pihak kapado tanak gulai, kuah sabalik daun bodi. Kok sia-sia nan litak, mamintak anak lidahnyo, ka lamak bana makannyo, ka sajuak bana minumnyo.
Bawarilah Kasumbo, disanduak nasi ka pinggan, dikaka-kaka manyaduak, diatai-atai manyanduak, bujuanyo samo bujuanyo, malintang samo malintang, di tapi samuik baliriang, elok dihirok diheraikan, elok makanan rajo-rajo, elok minuman sutan-sutan.
Dibao pinggan kalua, kalua ka tangah rumah, kabakeh urang nan banyak.
Nak lakeh samianglah juo, acok maknyo kunjuang sampai, dareh maknyo kunjuang tibo, lah makan urang nan banyak.
Bawarilah urang banyak, makan tigo suok hanyo sudah, kaampek jo basuah tangan, kalimo jo kumua-kumua.
Sudah makan urang nan banyak, diasak uranglah pinggan, disapu uranglah sarok.
Lah sudah sarok basapu, bakato Si Ali Amat, kabakeh urang nagari:
“Mano sagalo niniak-mamak, sado nan rapek di rumah ko, ado nan takalang pado lidah, ado nan taniek dalam hati.
Tatkalo maso daulunyo, kami nangko urang tabuang, kami urang buang baiaran, indak baniniak bamamak, indak bakaum kaluargo, indak bakorong bakampuang, kami nan hino di nagari.
Allah Taala maadokan, manolong rumah jo tanggo, manolong bareh jo padi.
Mungko kami imbau urang kampuang, kami nan sailia samudiak, kami nan bakorong dangan kampuang, itulah nan dibanakan”.
Manjawek urang  korong kampuang, sarato urang nagari:
“Apo dimukasuik dalam hati, apo takilan pado mato, buliah kami lakukan” katonyo urang nagari.
Bakato Si Ali Amat:
“Mano sagalo niniak-mamak, kami baniek dalam hati, kami andak mamintak doa, maimbau urang nagari, karano maso daulunyo, kami nan baduo urang, dibuang ibu jo bapak.
Lah jauah bana bajalan, indak tasaik di siangik, lah banyak bana parasaian.
Nan sakarang kini nangko, iolah mandeh kanduang ambo, nyak mambuang sado nan cabua, nak maampuni muluik nan talampau. Bak nan tun pulo di kami, niek di hati nak baralek. Kok asia alah lah asia, kok kabau alah bapauik, kok tabu alah bakilang, kok kayu alah bacari, kok bareh alah di sumpik, hanyo takurang di badan.
Tolonglah tolong, rang kampuang tolonglah, tolonglah urang nagari, io manjariah mamayahkan.
Kok tak ka ditolong jo luli,
Tolong jo gantiah ambo ba a,
Kok tak ka ditolong jo rugi,
Tolong jo jariah ambo ba a.
Io bak pantun urang,
tantang kapado badan ambo,
Kok babungo bungo labu,
Kok babuah buah mumbang,
Bak nan tunlah badan ambo,
Guno nan bak guno alu,
Kok tuah tuah-tuah musang.
Kalau lai sayang di rang buruak, kalau lai hibo di rang dagang, tuan pajariah papayahkan”.
Manjawab urang nagari:
“Kok itu nan mukasuik hati, kami lah pulo manjariahkan, kami lah pulo mamayahkan”.
Bakato Si Ali Amat:
“Kok kabau alah tapauik, kok bareh alah di sumpik”.
Bawari urang di kampuang, didabiah molah tu kabau, ditanak molah tu nasi. Lah sudah kabau badabiah, aleklah pulang bakeh urang nagari. Bago nan hereang nan gendeangnyo, bago nan ciciah nan panjuiknyo, Si Ali indak tahu pandai.
Namun katiko baralek, barayun-ayun urang banyak, babondong-bondong urang nagari, ka rumah Puti Kasumbo, lah sasak di dalam rumah.
Nak singkek samianglah juo, dareh maknyo kunjuang sampai, lah sudah alek minum makan, bakato Si Ali Amat:
“Mano ninik-mamak ambo, dangalah mak den tutuakan, dangalah mak den rundiangkan.
Tatkalo mulak mulonyo, kami baduo badansanak, Puti Kasumbo adiak ambo. Tatkalo awaknyo damam, bakato inyo bakeh ambo, babadan marasoi sakik, banyao marasoi mati. Kok molak molah ka mo den, kok mati hanyo awak den, kok pendek hanyo umua den, kok sampai hanyo hukum den, kaban den jan dilupokan. Bak nan tun janyo bakeh ambo. Itulah nan pitaruahnyo.
Kini lah tingga nyo di ambo, iolah salahnyo di ambo, itulah nan ka diabisi jo doa, jan taraso-raso juo, bak urang kasalatan garam.
Sabuah lai di nan rapek, io si upiak ketek nangko, indak inyo babapak, inyo talatak dalam kaban, kaban pitaruah Kasumbo.
Banyaklah asap nan ditangguangkannyo, banyak panggalan nan lah lakek, salahnyo dari ambo juo, nan tak mamacik pitaruah. Itulah nan ambo ampuni, itu nan ka diabisi jo doa”.
Bakato urang nan banyak:
“Kok lah bak nan tun janyo tuan, lah elok bana itu hanyo”.
Mandoa urang nan maalim. Lah sudah urang mandoa, urang bajalan anyo lai, tingga urang kampuang sabanta.
Bakato Si Ali Amat:
“Mano sagalo urang kampuang, kok hanyo alek alah lapeh, sabuah lai nan dipintak. Kami nangko urang buang baiaran, indak bakorong bakampuang, indak baniniak bamamak, indak batulan basudaro.
Kami nak pulang bakeh rang kampuang, nak sahino nak samalu. Kok hutang nak sabaia, kok malu nak satuntuik, io jo urang nagari”.
Bakato urang nagari:
“Kununlah itu dikatokan, pucuak dicinto ulan tibo, bago sakali tuan suko, baribu kali suko kami”.
Tantangan Si Ali Amat, barumah tanggonyo di sinan. lah suko di dalam hati, urang banyak baitu pulo.-

Tamat



Keterangan
a.            badua
b.           bintalak – hantu bintak, sejenis hantu.
c.            sakupang
d.           manalok kain – mencelup kain.
e.            karambia atok tungku – tiga batang pohon kelapa yang tersusun seperti tungku.
f.             sarimih – rimih, uang jaman dulu bernilai setengah sen.
g.            basibidai takirok
h.           karih sampono ganjo ireh – keris yang bersatu dengan gagangnya.
i.             bajo – penghitam gigi.
j.             padahan arang
k.           luhak (luak) – sumur.
l.             tayok – banyak.
m.         satereko sapitanak – waktu yang terpakai memasak nasi segantang beras.

                                                         

Tidak ada komentar:

Posting Komentar