Sabtu, 18 Januari 2014

CARITO RANDAI SANTAN BATAPIH: Ide Carito dek Kabun Rangkai Batuah (Alm)



Disusun Baliak Dek Musra Dahrizal Katik jo Mangkuto


(BAGIAN 8)

Keterangan
Aluran diri Patiah Maudun, jo diri Santan Batapih, lah barado dalam lingkaran, sabalun anak randai duduak.

Patiah Maudun (106-10)

Nak kanduang balahan diri
Palengah ayah salamoko
Heran lah ayah mamandangi
Mancaliak Santan nan lah tibo

Dek patang kalamari
Santan disuruah disarayo
Pai manyonsoang dandang panjang
Lai koh dapek nan dicari
Ba a koh kaba baritonyo
Cubolah Santan bari tarang


Santan Batapih (107-10)

Ayah kanduang dunia akhiraik
Pucuak bulek dalam nagari
Tampuak adaik tangkai pusako
Gadang lah naza dalam niaik
Mangkonyo ayah ambo cari
Danga dek ayah baritonyo

Kok hanyo Anggun Nan Tungga
Lai tabao sampai pulang
Sadang di rumah lah tu kini
Nan niaik Anggun Nan Tungga
Gadang sangajo nan nyo hadang
Inyo bakandak buruang nuri

Dek sampai ambo kamari
Mamintak kato ayah bana
Lapeh di ayah kami pai
Paisi kandak ka Nan Tungga

Jo Nan Tungga ambo nak pai
Ka rumah Dang Dami Sutan
Kok untuang tabao buruang nuri
Kandak Nan Gondo di Piaman
Lapeh di ayah kami pai.

Patiah Maudun (108-10)

Nak kanduang balahan diri
Sibiran tulang nan salapan
Kalau lah itu kandak hati
Ayah ndak suko malapeh-an

Walau nak pisang jo bakonyo
Santan rang ketek joloang gadang
Nan Tungga rang mudo matah
Buruak cando dipandang rupo
Dek adaik nyato balarang
Di syarak jaleh batagah

Hulu malang salah galogok
Hulu mujua pandai batinggang
Marantang kok salah kakok
Suto jo banang kok tabuang
Ba-apo pikiran Santan.

Santan Batapih (109-10)

Manolah ayah kanduang ambo
Kok itu rundiang nan mandatang
Rusuah rasonyo hati ambo
Janji dek alah kami karang

Sabab baitu kato ambo
Nan Tungga kok pai surang
Jalan nan pasa indak tantu
Ambo ka pai surang diri
Tungga ndak suko nyo malapeh

Lapeh di ayah kami pai
Capek kami babaliak pulang
Kok untuang dapek buruang nuri
Duduak nak ado baparintang
Tantu di ayah lah tapaham.

Patiah Maudun (110-10)

Nak kanduang sibiran tulang
Kalau baitu kareh hati
Ayah larang indak talarang
Ayah lapeh malah nan jadi

Tapi samantanng pun baitu
Pacik pitaruah dari ayah
Kok basuo Dang Dami Sutan
Bijak-bijak malah bakato
Elok-elok malah barundiang

Aluran Dang Dami Sutan
Inyo babako mudiak pulo
Kok bijak Dang Dami pado Santan
Santan kok payah arok sajo

Tagak nan Tungga kok bapaliang
Duduak nan Tungga kok bakisa
Sangka ndak dapek Santan jinjiang
Kok lari gunuang di kaja
Bapaham Santan tantang itu.

Santan Batapih (111-10)

Nan ayah katoan tadi
Itulah kato sabananyo
Malah baniaik ka nan suci
Kok malang ka ba a juo
Ambo bajalan hanyo lai.

Hap ...Tah ...Tih ...

Keterangan
Sudah barundiang jo ayahnyo, kok anyo Santan Batapih, babaliak pulang anyo lai, untuak pambateh legaran ko. Dek indak pakai gurindam, untuak pindah kanan Tungga, di anta sajo jo galombang, ditambah jo tapuak nan gak rimbun, sabalun anak randai duduak. Patiah Maudun lah kalua, Nan Tungga masuak ka dalam, lansuang basuo jo si Santan, sinan tabukak kato-kato.

Santan Batapih (112-10)

Oh...tuan Anggun Nan Tungga
Ambo lah babaliak dari ayah
Lah dapek kato tando rela
Lah sunyi kito malangkah

Nan pasan dari ayah tadi
Kapado tan Tungga Magek Jabang
Asa lai luruih pulang pai
Ayah nan indak kamalarang

Kini baitu hanyo lai
Pado dibimbang angan-angan
Kok untuang dapek kandak hati
Elok to ansua lah bajalan

Anggun Nan Tungga : 113-10

Pasan mamak dipacik arek
Tingga di kito mamakai-an
Karano rila nan lah dapek
Elok kini kito bajalan

Hap ...Tah ...Tih ...

Gurindam Legaran 11

Kato putuih inyo bajalan
Taruih sakali ka kualo
Naiak ka biduak hanyo lai

Dek kuaik Tungga mandayuang
Kok jauah raso lah tibo
Masuak kualo Koto Tanau

Turun biduak Santan bajalan
Tungga mairiang dibalakang
Rumah Dang Dami ditujunyo

Cameh di budi kanampak-an
Tibo di jalan tigo simpang
Santan Batapih lah bakato
Hap ...Tah ...Tih ...

Keterangan
Aluran diri Santan Batapih, jo diri Anggun Nan Tungga, lah samo dalam lingkaran, sabalun anak randai duduak, sudahtu Santan nyo bakato.

Santan Batapih (114-11)

Oh...tuan Anggun Nan Tungga
Iko kan labuah simpang tigo
Kito baranti lah sabanta
Auih jo latiah lah taraso

Limbak nan dari pado itu
Ambo pandangi sajak tadi
Tiok langkah tuan bamegu
Bantuak ndak lapeh kandak hati

Adang-adang tuan tamanuang
Sarupo pangalan tangguang uleh
Takana kolah jo rang kampuang
Atau koh niaik nan ndak lapeh

Atah jo bareh nak basisiah
Usah bacabang hati juo
Adokoh kandak nan ndak buliah
Rindu dimalah muaronyo
Tantu dek tuan lah ma-alum.

Anggun Nan Tungga (115-11)

Santan Batapih nan budiman
Sandaran untuang badan ambo
Kalau baitu kato Santan
Samo baranti malah kito

Aluran diri badan ambo
Mulo batulak dari kampuang
Sampai bacarai jo Salamaik
Ambo nan indak tau pandai
Untuang ka Santan disanda-an

Oh…Santan usahlah ragu
Aluran badan diri ambo
Indak ambo tagak bamegu
Niaik ndak sampai indak pulo

Nan takana di dalam batin
Tapikia dalam kiro-kiro
Lai di lengah jo nan lain
Gondoriah takana juo

Usah lah itu dipikiri
Oh...Santan gadih nan jombang
Rang mudo nan elok laku
Hanyo nan ragu dalam hati
Dek jalan tigo basimpang
Jalan nan malah ka dituju

Jalan nan malah kito tampuah
Ka rumah Dang Dami Sutan
Kato-an bana sungguah-sungguah
Usah balinduang kapanasan
Santan cubolah bari tarang

Santan Batapih (116-11)

Oh...tuan Anggun Nan Tungga
Pamuncak lambah di Piaman
Simpang kasuok nan takana
Karumah Dang Dami Sutan

Simpang kakida  kamusajik
Dimudiaknyo babalai adaik
Jalan nan luruih masuak kampuang
Iyo Nagari Koto Tanau

Oh…Tuan Anggun Nan Tungga
Kalau diagak dipikiri
Lai di ambo nan takana
Pado wakatu iko kini

Kok hanyo Dang Dami Sutan
Urangnyo agak kasek baso
Kalau baduo kito kian
Rasonyo nuri ndak tabao

Jikok tuan lai sasuai
Bialah ambo pai surang
Asah niaik lai kasampai
Usah diguluik digalonsang

Itu di ambo nan taraso
Ba apo pikiran tuan
Kok pai kito baduo
Raso kamalang ratak tangan
Apo pikiran tuan Tungga

Anggun Nan Tungga (117-11)

Usah disabuik duo kali
Jauah taibo hati ambo
Kalau nan niaik dalam hati
Rancak pai kito baduo

Cubolah pikia dek si Santan
Ambo ka duduak mananti
Kok tibo sudi rang dijalan
Jo alah tanyo kadibari

Ambo manuruik ndak dibao
Indak koh hibo maningga-an
Kok dapek pai baduo
Bara kasanang paratian

Hanyo harapan dari ambo
Oh...Santan nan manih muluik
Rang mudo nan elok baso
Malah asia nan dimungkasuik
Japuiklah diri badan ambo
Alah katarang tu dek Santan

Santan Batapih (118-11)

Mandanga kato dari tuan
Sulik diambo bapambari
Kalau baduo kito kian
Raso ndak dapek buruang nuri

Saba-saba tuan mananti
Kito ma-angan nuri urang
Untuang kok lai batapati
Timba baliak hati nak sanang

Tan Tungga si Magek Jabang
Sayang nan indak wak paduo
Nak jan talalai ambo pulang
Lapeh ambo jo hati suko
Jawek tangan tando lai sayang
Ambo bajalan kini juo.

Hap ...Tah ...Tih ...

Gurindam Legaran 12

Rundiang putuih kato batimbang
Santan bajalan maso itu
Nan karumah Puti Dang Dami

Si Santan hati lah bimbang
Magek Jabang bahati ragu
Raso ndak dapek buruang nuri

Mano sagalo niniak mamak
Kami aliah tujuan kato
Ka diri Dang Dami Sutan

Dalam manuang nuri tasintak
Dang Dami Sutan dicarinyo
Kini ba-andai bapaparan

Hap ...Tah ...Tih ...

Keterangan
Aluran diri buruang nuri, jo diri Dang Dami Sutan, lah ado dalam lingkaran, sabalun anak randai duduak, sudahtu nuri lah bakato.

Buruang Nuri (119-12)

Oh…uncu nan baiak budi
Oncu gadih Dang Dami Sutan
Agak mandakek lah kamari
Ambo nak barang di kato-an

Dang Dami Sutan (120-12)

Diak kanduang si buruang nuri
Nan bijak bakato-kato
Tagak dek imbau nan sakali
Tasirok darah di dado

Apo koh sabab karanonyo
Mangkonyo ambo dek di imbau
Ado ko rasia nan tasimpan
Nuri tarangkan pado ambo
Pado mambuek hati risau
Nak samo sanang paratian

Buruang Nuri (121-12)

Oh...oncu Dang Dami Sutan
Dek luruih oncu batanyo
Ambo ka luruih mangato-an
Danga dek uncu baritonyo

Ambo bamain ateh anjuang
Sadang bapikia samo surang
Mangipeh raso tali jantuang
Kironyo rasia nan lah

Ambo caliak kutiko limo
Galah salapan mangatoan
Nampaklah urang nan katibo
Inyo baduo jo si Santan

Santan Batapih nyo kamari
Jo diri Tungga Magek Jabang
Niaik mancari buruang nuri
Patuik disalang kanyo salang

Tapi nan sampai nyo kamari
Hanyo si Sntan surang sajo
Tungga disimpang nyo mananti
Dilabuah basimpang tigo

Kok tibo Santan Batapih
Pandai-pandai oncu barundiang
Si Santan muluik nyo manih
Di dalam lipek nyo manguntiang

Niaik mambali badan ambo
Paisi kandak ka nan Tungga
Nyo dayuang kasiah nan tajambo
Takuik dikabek nan kalungga
Uncu bapaham tantang itu

Dang Dami Sutan (122-12)

Diak kanduang si buruang nuri
Kalau baitu bunyi kato
Usah lah itu dipikiri
Kito nanti apo nan tibo
Kini baitu nan kabaiak
Nak sanang darah di dado
Rasio kito jan tabatiak
Kito tanangan samantaro.

Hap ...Tah ...Tih ...

Gurindam Legaran 13

Nan lah sudah bapadu padan
Yolah sanang hati Dang Dami
Tabayang kandak Magek Jabang

Mano panonton nan budiman
Kito japuik nan tingga tadi
Santan Batapih kito bincang

Nan dek capek Santan bajalan
Indak taraso badan payah
Raso kabuliah kandak hati

Santan lah tibo di halaman
Inyo maimbau dari bawah
Sadang barundiang lah tu kini

Hap ...Tah ...Tih ...

Basambuang ka bagian sambilan


Tidak ada komentar:

Posting Komentar